សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ ៖ សេចក្តីប្រកាសព័ត៌មានរបស់អ្នកនាំពាក្យសាលាដំបូងខេត្តក្រចេះ ចុះថ្ងៃទី២៥ ខែមករា ឆ្នាំ២០២៤ ករណីសំណុំរឿងព្រហ្មទណ្ឌលេខ ០៤៩ ចុះថ្ងៃទី១៨ ខែមករា ឆ្នាំ២០២៤ ដែលមានជនត្រូវចោទចំនួន ១០ នាក់ ជាប់ពីបទល្មើសដឹកជញ្ជូនដោយខុសច្បាប់នូវសារធាតុញៀន រក្សាទុកដោយខុសច្បាប់នូវសារធាតុញៀន ជួញដូរដោយខុសច្បាប់នូវសារធាតុញៀន និងដាំដោយខុសច្បាប់នូវសារធាតុញៀន ប្រព្រឹត្តនៅខេត្តក្រចេះ ខេត្តតាកែវ និងរាជធានីភ្នំពេញ អំឡុងឆ្នាំ២០២៣ ឆ្នាំ២០២៤។ នេះបេីយោងតាមប្រភពព័ត៍មានពីក្រសួងយុត្តិធម៌ បានឱ្យដឹងនៅរសៀលថ្ងៃទី២៦ ខែមករា ឆ្នាំ២០២៤។
សេចក្តីប្រកាសព័ត៌មានរបស់អ្នកនាំពាក្យ បានឱ្យដឹងទៀតថា ចំណែកវត្ថុតាងមួយចំនួនមានដូចជា៖ រុក្ខជាតិងាយនឹងក្រោម (កញ្ឆាស្ងួត) ទម្ងន់ ៤៣,៧ គីឡូក្រាម រុក្ខជាតិញៀន (កញ្ឆាស្រល់) ចំនួន ១៤០០ ដើម គ្រប់ពូជកញ្ឆា ទម្ងន់ ១៨៤,៤៨ ក្រាម និងទ្រព្យសម្បត្តិ សម្ភារៈមួយចំនួន។
ក្នុងចំណោមជនត្រូវចោទចំនួន ១០ នាក់ខាងលើ ឈ្មោះ អេង អង ភេទប្រុស និង ឈ្មោះ អ៊ួង សុបញ្ញា ភេទប្រុស ជាប់ពីបទល្មើសដឹកជញ្ជូនដោយខុសច្បាប់នូវសារធាតុញៀន។
ឈ្មោះ ជុន ញ៉ាញ់ ភេទស្រី និង ឈ្មោះ ហេង ហត់ ភេទប្រុស (គ្មានសាវតាជាតិ) ជាប់ពីបទល្មើសរក្សាទុកដោយខុសច្បាប់នូវសារធាតុញៀន។
ឈ្មោះ DANH TIEP ហៅលី ភេទប្រុស ជាប់ពីបទល្មើសដាំដោយខុសច្បាប់នូវសារធាតុញៀន និងជួញដូរដោយខុសច្បាប់នូវសារធាតុញៀន។
ឈ្មោះ ដែន រ៉ានី ភេទស្រី ឈ្មោះ ហុង ហុង (គ្មានសាវតាជាតិ) អញ្ញាតជន ឈ្មោះ ស្រីរ័ត្ន ភេទស្រី ឈ្មោះ ចេក ភេទប្រុស (គ្មានសាវតាជាតិ) ជាប់ពីជួញដូរដោយខុសច្បាប់នូវសារធាតុញៀន។
ចៅក្រមស៊ើបសួរ នៃសាលាដំបូងខេត្តក្រចេះ សម្រេចឃុំខ្លួនបណ្តោះអាសន្នលើជនត្រូវចោទ ចំនួន ៣ នាក់ ឈ្មោះ អេង អង ភេទប្រុស ឈ្មោះ អ៊ូង សុបញ្ញ ភេទប្រុស និងឈ្មោះ ជុន ញ៉ាញ់ ភេទស្រី ដើម្បីបន្តការស៊ើបសួរតាមនីតិវិធី។ ដោយឡែកជនត្រូវចោទផ្សេងទៀត ចៅក្រមស៊ើបសួរកំពុងបន្តចំណាត់ការស៊ើបសួរតាមនីតិវិធីច្បាប់៕
ដោយ៖ស តារា
