សារព័ត៌មាន នគរវត្ត តែងតែនាំមុខគេជានិច្ច
ខេត្តរតនគិរី៖ ការកាប់រុករាននិងដុតបំផ្លាញព្រៃឈើរាប់រយហិកតាយកដីរដ្ឋធ្វើជាកម្មសិទ្ធិនោះត្រូវបានក្រុមការងារចុះស្រាវជ្រាវពិនិត្យជាក់ស្ដែងហើយដោយយោងលិខិតបង្គាប់ការលេខ០៤១ល,ប,កចុះថ្ងៃទី១៨ ខែកញ្ញា ឆ្នាំ២០២៣របស់រដ្ឋបាលខេត្តរតនគិរី យោងលិខិតបង្គាប់ការលេខ០០៣ចុះថ្ងៃទី២២ ខែមករា ឆ្នាំ២០២៤ របស់រដ្ឋបាលស្រុកកូនមុំ បទបញ្ជាលោកមេបញ្ជាការកងរាជអាវុធហត្ថខេត្តរតនគិរីផងដែរ។
ទើបនៅថ្ងៃទី២៦ ខែមករា ឆ្នាំ២០២៤ក្រោមការចង្អុលបង្ហាញពីលោក ញ៉ែម សំអឿន អភិបាលនៃគណអភិបាលខេត្តរតនគិរី លោក ខ័ណ្ឌ ចំណាន អភិបាលរងខេត្ត បានដឹកនាំកម្លាំងសមត្ថកិច្ចចម្រុះរួមមាន: កម្លាំងជំនាញរដ្ឋបាលព្រៃឈើ កម្លាំងបរិស្ថាន កម្លាំងស្នងការដ្ឋានខេត្ត មន្ត្រីសុរិយោដីខេត្ត មេបញ្ជាការរងកងរាជអាវុធខេត្ត លោកអភិបាលរងស្រុកកូនមុំ កងរាជអាវុធហត្ថស្រុកកូនមុំ អធិការស្រុកកូនមុំផងដែរបានចុះត្រួតពិនិត្យជាក់ស្ដែងដល់ទីតាំងអំពីស្ថានភាពការកាប់បំផ្លាញទន្ទ្រានដីព្រៃរបស់រដ្ឋធ្វើជាកម្មសិទ្ធិ។
ការចុះត្រួតពិនិត្យនោះមានចំនួន៤ទីតាំងស្ថិតក្នុងភូមិកាំបាក់ ឃុំតឺន ស្រុកកូនមុំ ខេត្តរតនគិរីឃើញថាទីតាំងទី១ត្រង់ចំណុចទំពាំងកំភេម និយាមកាលេខ០៦៨៣ ២១០- ១៥១ ៦៧៦៩។
ទីតាំងទី២ ត្រង់ចំណុចជើងភ្នុំគ្រែខាងត្បូងនិយាមកាលេខ០៦៨២៨១៩-១៥១៧២៧៤។
ទីតាំងទី៣ ត្រង់ចំណុចខ្នងភ្នុំគ្រែនិយាមកាលេខ០៦៨២៤៣៦-១៥១៩១៤៣ និងទីតាំទី៤ ស្ថិតនៅជើងភ្នុំគ្រែខាងជើងនិយាមកាលេខ០៦៨២៣៣៩-១៥២០១៧៩ ដែលបានកាប់ទន្ទ្រាន។
ក្នុងនោះភាគច្រើនជាដីកាប់រានចាស់និងថ្មី តែបច្ចុប្បន្នដីខាងលើខ្លះៗត្រូវបានប្រជាពលរដ្ឋដាំដំឡូងមី ខ្លះទៀតដាំកៅស៊ូស្វាយចន្ទីនិងបានកសាងសាលាបុណ្យមិនទាន់ប្រក់ដំបូលនិងមានព្រះសង្ឃគង់នៅផងដែរ។
ដីដែលបានកាប់រានទាំង៤ទីតាំងខាងលើនេះនៅមិនទាន់ដឹងថាចំនួនប៉ន្មានហិកតានៅឡើយទេ រង់ចាំគណៈកម្មការគ្រប់គ្រងដីរដ្ឋពិនិត្យជាក់ស្ដែងសិន៕
ដោយ ៖ ជីវ័ន្ត
