សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី ៖ បាត់កូនស្រីជាទីស្រឡាញ់ ! បាត់គូកំណាន់ចិត្ត ស្មើថ្លើមជីវិត ដោយមិនដឹងដំណឹង កុំថាឡើយដល់ ក្តីព្រួយបារម្ភ ស្ទើរប្រេះទ្រូង ក្រៀមសួត កង្វល់ទុក្ខធំជាងភ្នំ សូម្បីតែការទទួលទានទឹក បាយ លេបក៏មិនចូលដែរ ។ ប្រសិនបើពួកគាត់ អាចពង្រួញផែនដីបាន គាត់ជប់ត្រឹមបុិនស្លឹកក្រសាំង ដើម្បីស្រួលរកមើលកូន រកគូដណ្តឹង ឱ្យបានឃើញ បើខឹងអង្វរ បើអន់ចិត្តលួងលោម អោយនាងទន់ចិត្ត បានត្រឡប់មកផ្ទះវិញ ។
មើលចុះ ! ម្តាយនិងគូដណ្តឹងតាមរកនាងក្រមុំព្នងបាត់ខ្លួន គ្មានដំណឹង ទាំងចិត្តចម្បែងរកទីបំផុតគ្មាន ។
តាមសេចក្តីរាយការណ៍ឲ្យដឹងថា ៖ កាលពីថ្ងៃទី៣១ ខែមករា ឆ្នាំ២០២៤ កន្លងទៅ ស្ត្រីជាម្តាយនិងបុរសជាគូដណ្តឹង បានទៅប្តឹងនគរបាលករណីបាត់កូនក្រមុំជនជាតិព្នងម្នាក់ ខណៈនាងបានចេញពីផ្ទះទៅរកក្របីនៅឯវាលស្រែ ។
កូនក្រមុំដែលបាត់ខ្លួននេះឈ្មោះ ខ្វិន យូ អាយុ១៦ឆ្នាំ ជាជនជាតិព្នង ជាកសិករ រស់នៅភូមិពូទ្រូ ឃុំសែនមនោរម្យ ស្រុកអូររាំង ខេត្តមណ្ឌលគិរី ។
តាមស្ត្រីជាម្តាយនិងគូដណ្តឹងរបស់កូនក្រមុំនោះឲ្យដឹងថា ៖ នៅថ្ងៃទី៣០ ខែមករា ឆ្នាំ២០២៤ វេលាម៉ោងប្រហែល១២និង៣០នាទីថ្ងៃត្រង់ កូនស្រីគាត់ដែលចេញទៅឃ្វាលក្របីបានប្រាប់គាត់ជាម្តាយថា «ម៉ែ បាត់ក្របីហើយ» បន្ទាប់មក នាងបានជិះម៉ូតូហុងដាឌ្រីម ស៊េរីឆ្នាំ២០១៩ ពណ៌ខ្មៅ ពាក់ផ្លាកលេខ មណ្ឌលគិរី ១A-៤៧៨៧ ចេញទៅរកក្របី ។
នាងចេញទៅបាត់១ថ្ងៃ ហើយរហូតដល់ម៉ោង៦ព្រឹកថ្ងៃទី៣១ ខែមករា ឆ្នាំ២០២៤ នៅមិនទាន់ឃើញត្រឡប់មកផ្ទះវិញទេ ។ បាត់យូរបែបនេះ ទើបគាត់ក៏ប្រញាប់ប្រញាល់ទូរស័ព្ទទាក់ទងបងប្អូនសាច់ញាតិ និងដើរសួរតាមផ្ទះអ្នកស្រុកឲ្យជួយរក ប៉ុន្តែមិនមានដំណឹងសោះ ។
ដោយបាត់កូនក្រមុំពេញមួយយប់មួយថ្ងៃនោះហើយ ទើបគាត់ជាម្តាយនិងគូដណ្តឹងរបស់នាង សម្រេចទៅដាក់ពាក្យបណ្តឹងនៅអធិការដ្ឋាននគរបាលស្រុកអូររាំង ដើម្បីឲ្យជួយអន្តរាគមន៍ស្វែងរកកូនក្រមុំ ដែលបាត់ខ្លួនមិនដឹងមូលហេតុនេះ ។
សមត្ថកិច្ច សាច់ញាតិ កំពុងស្វែងរក ក្រែងមានជួប ឧប្បត្តិហេតុអីផ្សេង ៕
ដោយ ៖ សិលា
