សារព័ត៌មាន នគរវត្ត តែងតែនាំមុខគេជានិច្ច
សហរដ្ឋអាមេរិកបានវេតូដំណោះស្រាយក្រុមប្រឹក្សាសន្តិសុខអង្គការសហប្រជាជាតិ (UN) ដែលអំពាវនាវឱ្យមានបទឈប់បាញ់ភ្លាមៗនៅក្នុងតំបន់ហ្គាហ្សា ដោយនិយាយថា វានឹងធ្វើឱ្យខូចដល់ការចរចាកិច្ចព្រមព្រៀងចំណាប់ខ្មាំង។
យោងតាម BBC និង Reuters សហរដ្ឋអាមេរិកគឺជាប្រទេសតែមួយគត់ដែលប្រឆាំងនឹងដំណោះស្រាយដែលអំពាវនាវឱ្យមានបទឈប់បាញ់ដែលចេញដោយអាល់ហ្សេរីនៅថ្ងៃទី 20 ខែកុម្ភៈ។ អង់គ្លេសបានអនុប្បវាទ ខណៈរដ្ឋសមាជិកក្រុមប្រឹក្សាសន្តិសុខចំនួន ១៣ ក្នុងចំណោម ១៥ ប្រទេសបានបោះឆ្នោតគាំទ្រ។ វ៉ាស៊ីនតោនជឿជាក់ថាដំណោះស្រាយដែលស្នើឡើងដោយអាល់ហ្សេរីនឹងប៉ះពាល់ដល់ការចរចាដើម្បីបញ្ចប់ជម្លោះ។
នេះជាលើកទីបីហើយដែលអាមេរិកបានវេតូចាប់តាំងពីជម្លោះអុីស្រាអែល និងក្រុមហាម៉ាស់បានផ្ទុះឡើងនៅថ្ងៃទី ៧ ខែតុលា ឆ្នាំ ២០២៣។ កាលពីខែធ្នូកន្លងទៅ វ៉ាស៊ីនតោនក៏បានវេតូវិសោធនកម្មលើសេចក្តីព្រាងសេចក្តីសម្រេចរបស់អង្គការសហប្រជាជាតិផងដែរ។
លោកស្រី Linda Thomas-Greenfield ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិបាននិយាយថា ឥឡូវនេះមិនមែនជាពេលវេលាត្រឹមត្រូវក្នុងការអំពាវនាវឱ្យមានបទឈប់បាញ់ជាបន្ទាន់ ខណៈដែលការចរចារវាងក្រុមហាម៉ាស់នឹងអុីស្រាអែលនៅតែកំពុងបន្ត។
សហរដ្ឋអាមេរិកបានចេញសេចក្តីសម្រេចព្រាងដាច់ដោយឡែកមួយ ដែលព្រមានអុីស្រាអែលកុំឱ្យវាយប្រហារទីក្រុង Rafah អំពាវនាវឱ្យមានបទឈប់បាញ់ជាបណ្តោះអាសន្នឱ្យបានឆាប់តាមដែលអាចធ្វើបានក្នុងលក្ខខណ្ឌដែលថា ចំណាប់ខ្មាំងទាំងអស់ត្រូវបានដោះលែង និងជំរុញឱ្យមានការដោះលែងចំណាប់ខ្មាំងទាំងអស់ ដកចេញនូវរបាំងជំនួយ ការដឹកជញ្ជូនទៅហ្គាហ្សា។
ទោះបីជាយ៉ាងណាក៏ដោយ វានៅតែមិនច្បាស់ថា តើនឹងនៅពេលណាដែលក្រុមប្រឹក្សាសន្តិសុខនឹងបោះឆ្នោតលើទម្រង់ភាសាដែលបានស្នើឡើងរបស់ទីក្រុងវ៉ាស៊ីនតោន។
យោងតាម Reuters ដំណោះស្រាយដែលស្នើឡើងដោយអាល់ហ្សេរីមិនភ្ជាប់បទឈប់បាញ់ជាមួយនឹងការដោះលែងចំណាប់ខ្មាំងទេ។ អាល់ហ្សេរីបានស្នើដោយឡែកពីគ្នានូវបទឈប់បាញ់មនុស្សធម៌ជាបន្ទាន់ និងការដោះលែងចំណាប់ខ្មាំងទាំងអស់ជាបន្ទាន់ដោយគ្មានលក្ខខណ្ឌ៕ ដោយ៖ ធីរីណា
រូបថត៖ Reuters
