សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រោយពីមានក្មេងទំនើង១ក្រុម ជិះម៉ូតូ ជាច្រើនគ្រឿង ដោយក្រុមនេះ ត្រូវបានគេស្គាល់ ឈ្មោះ Team ឫស្សីកែវ ឬស្សីតាន់ (RSK Team)។ ក្រុមក្មេងពាលទាំងនេះ បានជិះប្រដេញគ្នា ឡើងប្រសាចពេញផ្លូវ ហើយមិនតែប៉ុណ្ណោះ ក្រុមក្មេងស្ទាវ២នាក់ ក្នុងចំណោមគ្នីគ្នាច្រើននាក់ បានទាញដាវ គោលបំណងបម្រុង កាប់ទៅលើ សមត្ថកិច្ច ដែលកំពុងធ្វើដំណើរតាមផ្លូវ ប៉ុន្តែជិះរត់គេច ទៅបុកគូទ រថយន្តពីក្រោយ បណ្តាលឱ្យ រងរបួសទាំង២នាក់។
សមាជិក Team ឫស្សីកែវ ឬស្សីតាន់ (RSK Team) ២នាក់ ត្រូវសមត្ថកិច្ចឃាត់ខ្លួន កាលពីម៉ោង ០៥ទាបភ្លឺ ថ្ងៃទី១១ ខែមីនា ឆ្នាំ២០២៤ ស្ថិតនៅបណ្តោយផ្លូវ ២៧១ ស្តុបផ្សារដើមថ្កូវ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ និងបានបញ្ជូនទៅព្យាបាល នៅមន្ទីរពេទ្យរុស្ស៊ី។
តាមសម្ដីបុរសដែលជាកម្លាំងសមត្ថកិច្ចម្នាក់បានអោយដឹងថា មុនពេលកើតហេតុ ពួកគាត់មានគ្នា២នាក់ ចប់ម៉ោងការងារ បានជិះម៉ូតូធុនធំ២គ្រឿង ចេញពីហូបអីនៅម្តុំ អូរឫស្សី ហើយស្រាប់តែពេលនោះ ក៏មានក្រុមក្មេងស្ទាវមួយក្រុមមានគ្នា ប្រហែល៦ទៅ៧ម៉ូតូ ជិះប្រដេញគ្នា ឡើងប្រសាចពេញផ្លូវ ហើយមិនតែប៉ុណ្ណោះ ក្រុមក្មេងស្ទាវ២នាក់ក្នុងចំណោមគ្នីគ្នាច្រើននាក់ បានទាញដាវ រកកាប់ពួកគាត់ ដោយមិនដឹងថាមានរឿងអីនោះទេ ហើយណាមួយពួកគាត់ក៏ជាកងកម្លាំងផងដែរ ទើបធ្វើការប្រដេញឃាត់ក្រុមក្មេងស្ទាវទាំងជិះរត់ប្រសាចបំបែកផ្លូវគ្នាអស់ ដោយសល់តែម៉ូតូមួយគ្រឿង ម៉ាកស៊ុយស៊ុគីនិច ធូ ពណ៌ទឹកប៊ិច បានជិះជ្រុលទៅបុកនិងរថយន្តមិនស្គាល់ម៉ាក នៅចំនុចស្តុបផ្សារដើមថ្កូវ ផ្លូវ២៧១ សង្កាត់ផ្សារដើមថ្កូវ ខណ្ឌចំការមន បណ្តាលឲ្យក្មេងស្ទាវទាំងនោះ ដួលម៉ូតូ រងរបួសបែកមុខបែកមាត់ ហូរឈាម និងបាក់ដៃ ហើយមិនប៉ុណ្ណោះក៏មានធ្លាក់ដាវមួយដើមនៅកន្លែងកើតហេតុថែមទៀតផង។
ដោយសារតែករណីនេះកើតហេតុនៅខណ្ឌ៧មករា ដូច្នេះសមត្ថកិច្ចខណ្ឌចំការមន ឲ្យភាគីខាងកម្លាំងសមត្ថកិច្ច២នាក់ដែលត្រូវក្មេងស្ទាវដកដាវរកកាប់ រួមទាំងវត្ថុតាង យកទៅដាក់ពាក្យបណ្ដឹងនៅអធិការដ្ឋាននគរបាលខណ្ឌ៧មករា ដើម្បីឲ្យសមត្ថកិច្ចចាត់ការតាមនីតិវិធី ៕
ដោយ៖ ជ្រោយពេជ្រ
