សារព័ត៌មាន នគរវត្ត តែងតែនាំមុខគេជានិច្ច
Barcelona បានឈានដល់វគ្គ១/៤ផ្តាច់ព្រ័ត្រនៃក្របខ័ណ្ឌ Champions League ជាលើកដំបូងក្នុងរយៈពេល៤ ឆ្នាំជាមួយនឹងជ័យជម្នះដ៏រីករាយលើ Napoli ៣ទល់១ក្នុងជើងទី២ ។ ចំណែកក្រុមកាំភ្លើងធំ Arsenal បានឡើងទៅកាន់វគ្គនេះដែរដោយយកឈ្នះក្រុម Porto ដោយបាល់ប៉េណាល់ទីកាត់សេចក្តី បន្ទាប់ពីប្រកួតស្មើគ្នាទាំង២ជើង១ទល់១ ដែលកាំភ្លើងធំបានឡើងទៅកាន់វគ្គ៨ក្រុមនេះជាលើកដំបូងក្នុងរយៈពេល១៤ឆ្នាំ។
Barcelona បានយកឈ្នះ Napoli នៅជើងទី២ វគ្គ១៦ក្រុម ៣-១ និងសរុបទាំងពីរជើង ៤-២។ នេះជាលើកទី១ សម្រាប់ក្រុមរហស្សនាមអ្នកមានបុណ្យ សម្រាប់កៅអី៨ក្រុមចុងក្រោយ Champions League ក្រោយខកខាន៤ឆ្នាំជាប់គ្នា។ កីឡាករ Fermin Lopez, Joao Cancelo និង Robert Lewandowski បានធ្វើឱ្យ Barcelona រកបាន៣គ្រាប់ទៅលើក្រុមភ្ញៀវ។
គ្រាប់ទី១ រកបានដោយខ្សែបម្រើវ័យ២០ឆ្នាំ Lopez នៅនាទីទី១៥, គ្រាប់ទី២រកបានដោយ Joao Cancelo នៅនាទីទី១៧ និងគ្រាប់ទី៣រកបានដោយLewandowski នៅនាទីទី៨៣ ខណៈដែលក្រុមភ្ញៀវរកបាន១គ្រាប់នៅនាទីទី៣០ ដោយខ្សែការពារកណ្តាល Kosovan Rrahmani។
Barcelona ដណ្តើមបានជ័យជម្នះជាលើកដំបូងក្នុងការប្រកួតវគ្គជម្រុះក្នុងក្របខ័ណ្ឌ Champions League ចំនួន៥ដង នៅពេលដែល Lewandowski បានស៊ុតបាល់បញ្ចូលទីក្នុងផ្ទះ បន្ទាប់ពីត្រូវបានបង្កើតឡើងដោយកីឡាករ Sergi Roberto ។
ចំណែក Arsenal បានឈានដល់វគ្គ៨ក្រុមចុងក្រោយនៃក្របខ័ណ្ឌ Champions League ជាលើកដំបូងចាប់តាំងពីឆ្នាំ២០១០បន្ទាប់ពីបានផ្តួលក្រុម Porto ក្នុងការស៊ុតបាល់ប៉េណាល់ទី បន្ទាប់ពីភាពតានតឹងមួយយប់នៅកីឡដ្ឋាន Emirates។ ការឡើងទៅវគ្គ៨ក្រុមចុងក្រោយ UEFA Champions League នេះគឺជាលើកដំបូងក្រោយខកខាន១៤ឆ្នាំ តាមរយៈការទម្លាក់ FC Porto ដោយបាល់កាត់សេចក្តី១១ម៉ែត្រក្នុងលទ្ធផល ៤-២។
ក្នុងជំនួបជើងទី២ វគ្គ១៦ក្រុមចុងក្រោយ នៅកីឡដ្ឋាន Emirates រាត្រីថ្ងៃទី១២ ខែមីនា Leandro Trossard ជាអ្នកសម្រេចទីគ្រាប់ជ័យជម្នះដើម្បីជួយ Arsenal ឈ្នះ Porto ១-០។ ដោយជើងទី១ ក្រុមពីព័រទុយហ្កាល់ ឈ្នះក្រុមអង់គ្លេស ១-០ (សរុបទាំងពីរជើង ១-១) តម្រូវឱ្យក្រុមទាំងពីរ ថែមម៉ោង ១៥នាទីពីរដង។ ៣០នាទីក្នុងម៉ោងបន្ថែម ក្រុមទាំងពីរនៅតែមិនអាចរកគ្រាប់បាល់បាន ទើបឈានដល់វគ្គកាត់ក្តីប៉េណាល់ទី ដោយ Arsenal ឈ្នះ Porto ៤-២។
ក្រោមការដឹកនាំដ៏លេចធ្លោរបស់អ្នកចាត់ការទូទៅលោក Mikel Arteta ទីបំផុតកាំភ្លើងធំ អាចបង្ហាញមុខក្នុងក្របខ័ណ្ឌអឺរ៉ុបវគ្គ៨ក្រុមចុងក្រោយលើកដំបូង ក្រោយរង់ចាំ១៤ឆ្នាំ។ Arsenal ធ្លាក់ត្រឹមវគ្គ១៦ក្រុមចុងក្រោយ ចំនួន៧លើកជាប់គ្នា។
គួរបញ្ជាក់ថា ក្រុមដែលបានកក់កៅអីវគ្គ៨ក្រុមចុងក្រោយរកឃើញ៦ក្រុមហើយ រួមមាន ម្ចាស់ការពារតំណែងជើងឯក Man City, Bayern Munich, Real Madrid, PSG, Barcelona និង Arsenal៕
ដោយ៖ ភារៈ(រូបភាព ៖ BBC Sport)
