រថយន្តនិងម៉ូតូបុកគ្នានៅលើស្ពានវត្តគរបណ្តាលឱ្យស្ត្រីម្នាក់ធ្លាក់ចូលទឹកស្ទឹងសង្កែស្លាប់

ខេត្តបាត់ដំបង៖ ស្ត្រីម្នាក់បានស្លាប់ភ្លាមៗនៅនឹងកន្លែងក្រោយជួបឧបទ្ទវហេតុគ្រោះថ្នាក់ចរាចរណ៍រវាងរថយន្តបុកជាមួយម៉ូតូកាលពីម៉ោង៨យប់ថ្ងៃទី១៤ ខែមីនា ឆ្នាំ២០២៤ នៅតាមបណ្តោយផ្លូវជាតិលេខ៥៧ ត្រង់ចំណុចស្ពានវត្តគរ ស្ថិតក្នុងភូមិវត្តគរ សង្កាត់វត្តគរ ក្រុងបាត់ដំបង។

ប្រភពព័ត៌មាននៅកន្លែងកើតហេតុបានឱ្យដឹងថា នៅមុនពេលកើតហេតុគេឃើញម៉ូតូម៉ាក HONDA  SCOOPY ពណ៌សមួយគ្រឿង ពាក់ស្លាកលេខ បាត់ដំបង 1AR-8089 បើកបរដោយស្ត្រីម្នាក់ក្នុងទិសដៅពីលិចទៅកើត លុះមកដល់ចំណុចកើតហេតុ ស្រាប់តែមានរថយន្តម៉ាក តូយ៉ូតា HIGHLANDER ពណ៌ទឹកប្រាក់ ពាក់ស្លាកលេខ ភ្នំពេញ2AL-1648 បើកបរដោយបុរសម្នាក់ក្នុងល្បឿនយ៉ាងលឿនក្នុងទិសដៅពីកើតទៅលិចបានរេចង្កូតទៅបុកបង្កាន់ដៃស្ពានជាច្រើនចន្លោះនិងបន្តទៅបុកម៉ូតូពេញទំហឹងបណ្តាលឱ្យម៉ូតូបេុីងជិត១០០ម៉ែត្រ និងជនរងគ្រោះធ្លាក់ចូលស្ទឹងសង្កែស្លាប់ភ្លាមៗ។

បន្ទាប់ពីកើតហេតុសមត្ថកិច្ចនគរបាលជំនាញបានចុះទៅដល់ឃាត់ខ្លួនជនបង្ក រួចវាស់វែងធ្វើកំណត់ហេតុ និងដឹកសាកសពយកទៅតម្កល់ទុកនៅវត្តបច្ឆា ដើម្បីរង់ចាំសាច់ញាតិមកទទួលយកទៅធ្វើបុណ្យតាមប្រពៃណី។ ចំណែកមធ្យោបាយទាំងពីរត្រូវសមត្ថកិច្ចស្ទូចយកទៅរក្សាទុកនៅការិយាល័យនគរបាលចរាចរណ៍ផ្លូវគោកខេត្តបាត់ដំបង ដើម្បីចាត់ការតាមនីតិវិធី ៕

ដោយ៖ ជ្រោយពេជ្រ