សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត៖ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនៃស្នងការដ្ឋាននគរបាលខេត្តកំពត នៅព្រឹកថ្ងៃអាទិត្យទី១៧ ខែមីនា ឆ្នាំ២០២៤នេះ បានឱ្យដឹងថា ករណីភ្លើងឆេះក្នុងឧទ្យានបូកគោបានរលត់ហើយ ផលប៉ះពាល់ទៅលើដំណាំនិងព្រៃឈើប្រហែល ៤០ហិកតា អ្វីដែលសំខាន់គឺមិនមានគ្រោះថ្នាក់ដល់អាយុជីវិតប្រជាពលរដ្ឋនិងលំនៅឋានរបស់ប្រជាពលរដ្ឋ។
លោកឧត្តមសេនីយ៍ទោស្នងការ ក៏បានបញ្ជាក់កាលពីយប់ថ្ងៃទី១៦ មីនាថា៖ ករណីអគ្គិភ័យនៅជួរជើងភ្នំបូកគោកម្លាំងបង្ក្រាបអគ្គិភ័យបានត្រៀមដើម្បីការពារបងប្អូនរួចរាល់ហើយ។ ការឆេះនេះដោយសារអាកាសធាតុក្តៅ ហើយមិនមានផ្លូវសម្រាប់រថយន្តពន្លត់អគិ្គភ័យឡើងទៅពន្លត់បាន ដូច្នេះយើងត្រៀមម្ចាស់ការដើម្បីការពារលំនៅឋានរបស់បងប្អូននៅតាមជើងភ្នំវិញ ក្នុងករណីបន្ទាន់សូមទាក់ទងមកលេខខាងក្រោមនេះ 087818322 ។
បន្ថែមពីនេះ លោកស្នងការបានបញ្ជាក់ថា គិតត្រឹមម៉ោង ៩យប់មិញនេះ ករណីអគ្គិភ័យនៅជើងភ្នំបូកគោបានថមថយបន្តិចហើយ ភ្លើងមិនបានឆេះរាលដាលមកក្រោយជាសញ្ញាល្អសម្រាប់ប្រជាពលរដ្ឋដែលរស់នៅតាមជើងភ្នំ ហើយកម្លាំងក៏នៅបន្តតាមដានស្ថានភាពនៃការឆេះនេះដែរ៕
ដោយ៖ តារា
