សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នៅរសៀលថ្ងៃទី១៨ ខែមីនា ឆ្នាំ២០២៤នេះ លោកស្រីពុំ ចន្ទីនី អគ្គលេខាធិការ កាកបាទក្រហមកម្ពុជា បានអញ្ជើញដឹកនាំគណៈប្រតិភូចូលរួមដាក់កម្រងផ្កាគោរពវិញ្ញាណក្ខន្ធសព លោក ឃួន ផល្លារិទ្ធ នាយករងខុទ្ទកាល័យ និងជាប្អូនប្រុសបង្កើតរបស់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា ដែលបានទទួល មរណភាពកាលពីថ្ងៃសៅរ៍ ៧កើត ខែផល្គុន ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី១៦ ខែមីនា ឆ្នាំ ២០២៤ វេលាម៉ោង ១៧:៤០នាទី ក្នុងជន្មាយុ៦៧ឆ្នាំ ដោយរោគាពាធ។
ស្ថិតក្នុងសមានទុក្ខដ៏ក្រៀមក្រំនេះ លោកស្រី ពុំ ចន្ទីនី បានប្រគល់ជូនសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នូវសារលិខិតរំលែកមរណទុក្ខរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាក បាទក្រហមកម្ពុជា ដែលក្នុងសារលិខិតនោះ សម្តេចកិត្តិព្រឹទ្ធបណ្ឌិត ចាត់ទុកថា «មរណភាពរបស់ ឯកឧត្តម ឃួន ផល្លារិទ្ធ គឺជាការបាត់បង់នូវប្អូនប្រុសបង្កើតជាទី ស្រឡាញ់ ស្វាមីជាឪពុកនិងជាជីតាជាទីស្រលាញ់របស់បងស្រី កូននិងចៅៗ រួមទាំងញាតិមិត្តទាំងអស់ ជា ពិ សេសគឺបាត់បង់ ធនធានមនុស្សម្នាក់ ដែលតែងតែលះ បង់មិនខ្លាចនឿយហត់ក្នុងការបម្រើស្ថាប័ននីតិបញ្ញាតិ ក្រោមការដឹកនាំ របស់សម្ដេចមហារដ្ឋសភាធិការធិបតី ហើយលោកជាកម្មាភិបាលម្នាក់នៃគណៈឃោសនា អប់រំមជ្ឈិមបានចូលរួមយ៉ាងសកម្មនៃការងារសតិអារម្មណ៍ ដើម្បីកសាងមាតុភូមិដោយស្មោះស្ម័គ្រឥត ងាករេ។»
ក្នុងវេលាដ៏សោកសង្រេងប្រកបដោយសេចក្តីសង្វេគជាទីបំផុតនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសហការី សូមរំលែកនូវមរណទុក្ខដ៏ក្រៀមក្រំនេះជាមួយ សម្តេចរដ្ឋសភាធិបតី និងក្រុមគ្រួសារ និងសូមបួងសួងឱ្យដួង វិញ្ញាណក្ខន្ធសពលោកឃួន ផល្លារិទ្ធ សូមបានសោយសុខក្នុងសុគតិភពជានិច្ចនិរន្តកុំបីឃ្លៀងឃ្លាតឡើយ៕
ដោយ៖ សូរិយា
