សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ លោក សេដ្ឋា ថាវីស៉ីន (Srettha Thavisin )នាយករដ្ឋមន្ត្រីថៃ បានប្រាប់សារព័ត៌មាន រ៉យទ័រ (Reuters) ថា៖ នេះគឺជាពេលវេលាដ៏ល្អដើម្បីបើកការចរចាជាមួយមីយ៉ាន់ម៉ា ខណៈដែលរបបយោធាដែលបានដណ្តើមអំណាចនៅក្នុងរដ្ឋប្រហារឆ្នាំ២០២១ កំពុងចុះខ្សោយ។
ប្រទេសមីយ៉ាន់ម៉ា កំពុងស្ថិតក្នុងភាពចលាចល នៃការបះបោរតាមតំបន់ជួរមុខជាច្រើន ដោយក្រុមប្រឆាំងរដ្ឋាភិបាលបានចាប់សម្ព័ន្ធមិត្តនឹងគ្នា ដែលទទួលការគាំទ្រដោយរដ្ឋាភិបាលគាំទ្រលទ្ធិប្រជាធិបតេយ្យបានដណ្តើមកាន់កាប់ប៉ុស្តិ៍យោធា និងទីប្រជុំជនជាច្រើន រួមទាំងផ្នែកខ្លះ នៃទីប្រជុំជនសំខាន់មួយនៅតាមព្រំដែនជាមួយប្រទេសថៃកាលពីចុងសប្តាហ៍។
ការបះបោរគឺជា បញ្ហាប្រឈមដ៏ធំបំផុតដែលរបបយោធាមីយ៉ាន់ម៉ា បានប្រឈមមុខចាប់តាំងពីខ្លួនបានធ្វើរដ្ឋប្រហារប្រឆាំងនឹងរដ្ឋាភិបាលជាប់ឆ្នោតក្នុងឆ្នាំ២០២១។
លោក Srettha បាននិយាយក្នុងបទសម្ភាសន៍ មួយនៅកោះរមណីយដ្ឋាន Samui កាលពីថ្ងៃអាទិត្យថា “របបដែលគ្រប់គ្រងបច្ចុប្បន្នកំពុងតែចាប់ផ្តើមបាត់បង់កម្លាំងខ្លះ ប៉ុន្តែទោះចាញ់បីជាកំពុងចាញ់ ក៏ពួកគេនៅមានអំណាច និងអាវុធដែរ”។
លោកបានបន្តថា “ប្រហែលជាដល់ពេលហើយដើម្បីឈានទៅរកដំណោះស្រាយហើយ”។
ប្រទេសថៃបាននិងកំពុងបន្តកិច្ចសហប្រតិបត្តិការជាច្រើនជាមួយមីយ៉ាន់ម៉ា ចាប់តាំងពីលោក Srettha ឡើងកាន់អំណាចកាលពីខែសីហាឆ្នាំមុន រួមទាំងការផ្តល់ជំនួយដល់ប្រទេសមីយ៉ាន់ម៉ាក្រោមគំនិតផ្តួចផ្តើមមនុស្សធម៌ក្នុងគោលបំណងត្រួសត្រាយផ្លូវសម្រាប់កិច្ចចរចារវាងជំរុំសង្គ្រាម៕
ដោយ៖ តារា
