🔥🔥ដាំបបរឱ្យកូន ឡើងទៅដេក ភ្លេចបិទចង្ក្រាន្តហ្គាស ឆេះផ្ទះបាយមួយខ្នង នៅស្រុកកំពង់រោទិ៍

ខេត្តស្វាយរៀង៖ ផ្ទះបាយមួយខ្នង សង់អំពីឈើប្រក់ស័ង្កសី ទំហំ៣ម៉ែត្រគុណនិង៤ម៉ែត្រ និងម៉ូតូមួយគ្រឿងឆេះ ខូចខាតទាំងស្រុង ខណៈដោយសារមូលហេតុ ផ្ទុះកំប៉ុងហ្គាស បង្កការភ្ញាក់ផ្អើលដល់អ្នកភូមិទាំងទាបភ្លឺ នៅស្រុកកំពង់រោទិ៍។

យោង តាមសមត្ថកិច្ចនគរបាលស្រុកបានអោយដឹងនៅរសៀលថ្ងៃទី១១ខែមេសាឆ្នាំ២០២៤នេះថាម្ចាស់ផ្ទះមានឈ្មោះ សេន សារ៉ូត ភេទស្រី ៣០ឆ្នាំមុខរបរកម្មករ រស់នៅភូមិអង្គក្ដួច ឃុំព្រះពន្លា ស្រុកកំពង់រោទិ៍ខេត្តស្វាយរៀង។

ប្រភពបន្តថា កាលពីវេលាម៉ោង៥និង៥៥នាទីថ្ងៃទី១០ខែមេសាឆ្នាំ ២០២៤ កម្លាំងប៉ុស្ដិ៍ព្រះពន្លាបានទទួល ព័ត៌មានពីប្រជាពលរដ្ឋឈ្មោះ ឡុក យ៉ុន ភេទប្រុស អាយុ៤៦ឆ្នាំ មុខរបរកសិករបានរាយការណ៍មកថាមានកណីអគ្គិភ័យឆាបឆេះផ្ទះបាយ១ខ្នងនៅចំណុចភូមិអង្គក្ដួច ឃុំព្រះពន្លា។

ក្រោយទទួលបានព័ត៌មាននេះភ្លាមកម្លាំងប៉ុស្ដិ៍បានចុះដល់កន្លែងកើតហេតុខាងលើ ដើម្បីអន្តរាគមន៍ឃើញថាមានករណីអគ្គិភ័យពិតមែន ខណៈកើតហេតុ នៅវេលាប្រហែលម៉ោង ៣និង១០នាទីទាបភ្លឺឈានចូលថ្ងៃទី១១ ខែមេសា ឆ្នាំ២០២៤ ដោយសារម្ចាស់ផ្ទះបានបើកចង្ក្រានហ្គាស ដាំបបរអោយកូនរួចហើយក៏បានឡើងទៅដេក លើផ្ទះ មានការធ្វេសប្រហែស មិនបានបិទ ចង្ក្រាន បានត្រឹមត្រូវ។

ចំពោះសម្ភារ:ខូចខាតរួមមាន៖ ផ្ទះបាយមួយខ្នង សង់អំពីឈើប្រក់ស័ង្កសី ទំហំ ៣ម៉ែត្រគុណនិង៤ម៉ែត្រ ,ម៉ូតូម៉ាកហុងដាផលិតឆ្នាំ២០២០ពណ៌ខ្មៅចំនួន១គ្រឿង ,អង្ករ១ បេ និងសម្ភារ:ផ្ទះមួយចំនួន ចង្ក្រានហ្គាស ១និងហ្គាសចំនួន១២កំប៉ុង សំណាងមិនមានមនុស្សរងគ្រោះថ្នាក់ ៕

ដោយ៖ សុថាន