កីឡាករបាល់ឱបសញ្ជាតិអង់គ្លេសម្នាក់ត្រូវជាប់ពន្ធនាគារ៤ខែក្រោយមានអំពើហិង្សាក្នុងហាងស្រាមួយក្នុងប្រទេសអេស្ប៉ាញ

ចែករំលែក៖

កីឡាករបាល់ឱបអង់គ្លេសឈ្មោះ Billy Vunipola ត្រូវបានកាត់ទោសឱ្យជាប់ពន្ធនាគាររយៈពេល៤ខែ និងពិន័យជាប្រាក់ចំនួន២៤០អឺរ៉ូ (២៥៦.៩២ដុល្លារអាមេរិក) សម្រាប់ការប្រើអំពើហិង្សាដោយយកដុំថ្មវាយគូជម្លោះ បន្ទាប់ពីត្រូវបានចាប់ខ្លួនដោយប៉ូលិសនៅទីក្រុង Mallorca ប្រទេសអេស្ប៉ាញ បន្ទាប់ពីឧប្បត្តិហេតុនៅហាងស្រាមួយកន្លែង។

តុលាការពិនិត្យរបស់ Palma ក៏បានបញ្ជាឱ្យគាត់បង់ប្រាក់ចំនួន៥០០អឺរ៉ូដល់មន្រ្តីប៉ូលិសម្នាក់ដែលបានរងរបួសក្នុងអំឡុងពេលឧប្បត្តិហេតុបន្ទាប់ពីការកាត់ក្តីយ៉ាងឆាប់រហ័សកាលពីថ្ងៃអាទិត្យ។

នៅក្រោមច្បាប់របស់អេស្ប៉ាញ ការផ្តន្ទាទោសដាក់ពន្ធនាគារតិចជាង២ឆ្នាំជាធម្មតាមិននាំឱ្យមានការជាប់ពន្ធនាគារគ្រប់ពេលទេ លុះត្រាតែមានកំណត់ត្រាឧក្រិដ្ឋកម្មពីមុន។

យោងតាមរបាយការណ៍មួយនៅក្នុងកាសែត Ultima Hora បានឱ្យដឹងថា Vunipola ត្រូវបានប៉ូលិសចាប់ខ្លួនពីរដងបន្ទាប់ពីបានគំរាមកំហែងអតិថិជន និងបុគ្គលិកសន្តិសុខ ហើយបានដោះអាវរបស់គាត់នៅក្នុងបារមួយដែលមានឈ្មោះថា Epic ក្នុងទីក្រុង Palma កាលពីព្រឹកថ្ងៃអាទិត្យ។

របាយការណ៍បានបន្ថែមថា បុរសវ័យ៣១ឆ្នាំរូបនេះត្រូវបានប៉ូលិសដាក់ខ្នោះដៃ ហើយត្រូវបានបញ្ជូនទៅមន្ទីរពេទ្យ Son Espases ក្នុងទីក្រុង Palma ជាកន្លែងដែលគាត់កំពុងសម្រាក មុនពេលត្រូវបានបញ្ជូនទៅតុលាការនៅរសៀលថ្ងៃអាទិត្យ។

Vunipola លេងឱ្យក្លិបបាល់ឱប Premiership Rugby Saracens ដែលបានប្រកាសនៅក្នុងសេចក្តីថ្លែងការណ៍ថា ពួកគេបានដឹងពីឧប្បត្តិហេតុនេះ ហើយនឹងដោះស្រាយវាផ្ទៃក្នុង ។

អ្នកនាំពាក្យអគ្គស្នងការនគរបាលជាតិអេស្ប៉ាញបានឲ្យដឹងថា “នៅព្រឹកព្រលឹមនគរបាលជាតិបានបន្តការចាប់ខ្លួនបុរសជនជាតិបរទេសអាយុ៣១ឆ្នាំម្នាក់ ពីបទប្រព្រឹត្តបទឧក្រិដ្ឋ មិនស្តាប់បង្គាប់ និងវាយមន្ត្រីនគរបាលម្នាក់”។

Vunipola នៅក្នុងសេចក្តីថ្លែងការណ៍មួយដែលចែករំលែកដោយ Saracens កាលពីថ្ងៃចន្ទបានបដិសេធមិនគំរាមកំហែងនរណាម្នាក់ឡើយ។ Vunipola បានបង្ហាញខ្លួនចំនួន៧៥លើកសម្រាប់ក្រុមអង់គ្លេស និងជាផ្នែកមួយនៃក្រុមដែលបានបញ្ចប់ចំណាត់ថ្នាក់ជើងឯកនៅក្នុងការប្រកួតបាល់ឱបពិភពលោកឆ្នាំ២០១៩។ គាត់មិនត្រូវបានជ្រើសរើសនៅក្នុងក្រុមអង់គ្លេសសម្រាប់ Six Nations ឆ្នាំនេះទេ ៕