សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ ជនសង្ស័យគ្រឿងញៀនប្រុសស្រី២នាក់ត្រូវកម្លាំងនគរបាលឃាត់ខ្លួនជាមួយគ្រឿងញៀន WY ចំនួន ១៩.០៦១គ្រាប់ និងខេ ៦ថង់ ។
សមត្ថកិច្ចបានឱ្យដឹងថា ដោយមានការណែនាំនិងបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្ត កម្លាំងនគរបាលទូទាំងខេត្តត្រូវបង្ក្រាបរាល់បទល្មើសព្រហ្មទណ្ឌ ក្មេងទំនើង ពិសេសបទល្មើសជួញដូរគ្រឿងញៀន ដើម្បីធានាបាននូវសន្តិសុខ សណ្ដាប់ធ្នាប់ សុវត្ថិភាពសង្គមជូនប្រជាពលរដ្ឋ។
សមត្ថកិច្ច បានឲ្យដឹងថា កាលពីថ្ងៃទី០២ ខែឧសភា ឆ្នាំ២០២៤នៅវេលាម៉ោង០៦និង០០នាទីល្ងាច លោកឧត្តមសេនីយ៍ត្រី ធិន ស៊ិនដេត ស្នងការរង ទទួលផែនការងារប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តបន្ទាយមានជ័យ បានដឹកនាំកម្លាំងការិយាល័យនគរបាលប្រឆាំងគ្រឿងញៀន សហការជាមួយកម្លាំងអធិការដ្ឋាននគរបាលក្រុង-ស្រុក ដោយមានការសម្របសម្រួល ពីលោក ព្រះរាជអាជ្ញារង លឹម ប៊ុនសុភ័ក្រ បានបើកការស្រាវជ្រាវនិងឃាត់បានជនសង្ស័យប្រុសស្រីចំនួន០២នាក់ រួមមាន: ១- ឈ្មោះ ឆេង លាង ភេទប្រុស អាយុ៣៩ឆ្នាំ នៅចំណុចតាមផ្លូវសាធារណៈស្ថិតនៅភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត។ ២-ឈ្មោះ សាន សាណា ភេទស្រី អាយុ៣៩ឆ្នាំ នៅចំណុច ការ៉ាសសាំងPTT ស្តិតក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ។ ដកហូតបានវត្ថុតាង ១-ម្សៅក្រាមស(ខេ)ចំនួន៦ថង់តូចទម្ងន់៣០៨,៤០ក្រាម ២-ថ្នាំគ្រាប់អក្សរ wyចំនួន ១៩.០៦១គ្រាប់ ថវិកាមួយចំនួន និង សម្ភារ:ពាក់ព័ន្ធមួយចំនួន។
បច្ចុប្បន្នជនសង្ស័យទាំង០២នាក់និងវត្ថុតាង ត្រូវបាននគរបាលឃាត់ខ្លួនយកមកសួរនាំ និង កសាងសំណុំរឿងបញ្ជូនទៅតុលាការចាត់ការបន្ត៕
ដោយ៖ វណ្ណា
