សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ទំនាស់ពាក្យសម្តីពីរឿងចែកដីកេរពីឪពុកម្តាយឈានដល់ប្រើហិង្សារបួសធ្ងន់ម្នាក់ ត្រូវសមត្ថកិច្ចឃាត់ខ្លួនក្មេងប្រុសម្នាក់នៅស្រុករំដួល។
ហេតុការណ៍នេះបានកើតឡើងនៅវេលាម៉ោង៩និង២០នាទីថ្ងៃទី១៦ ខែឧសភា ឆ្នាំ ២០២៤ នៅចំណុចផ្ទះឈ្មោះ សឹង អាន (ពលករនៅកូរ៉េ) ស្ថិតក្នុងភូមិត្រពាំងដំរី ឃុំកំពង់អំពិល ស្រុករំដួល ខេត្តស្វាយរៀង។
យោងតាមសមត្ថកិច្ចនគរបាលបានឱ្យដឹងថា បុរសដែលរងរបួសធ្ងន់មានឈ្មោះសឹង សុវណ្ណនី ហៅវិត អាយុ៤៥ឆ្នាំ មុខរបរកម្មកររោងចក្របាវិត រស់នៅភូមិត្រពាំងដំរី ឃុំកំពង់អំពិល ស្រុករំដួល ខេត្តស្វាយរៀង។
ចំណែកក្មេងប្រុសដែលត្រូវជាក្មួយបង្កើតដែលបានប្រើហិង្សាមានឈ្មោះ រ៉េន លីហ៊ូ អាយុ១៣ឆ្នាំ ត្រូវជាកូនបង្កើតរបស់ឈ្មោះ សឹង អេង ជាប្អូនស្រីបង្កើតរបស់ជនរងគ្រោះ។
ប្រភពបន្តថា កាលពីវេលាម៉ោង៩និង២០នាទីមានករណីហិង្សាដោយចេតនាមួយបានកើតទ្បើងនៅចំណុចផ្ទះឈ្មោះ សឹង អាន (ពលករនៅកូរ៉េ) ស្ថិតនៅភូមិត្រពាំងដំរី ឃុំកំពង់អំពិល ស្រុករំដួល ខេត្តស្វាយរៀង រវាងឈ្មោះ សឹង សុវណ្ណនី បានមានទំនាស់ពាក្យសម្តីពីរឿងចែកដីកេរពីឪពុកម្តាយ ដោយបានធ្វើសកម្មភាពចាប់ក្របួចសក់ឈ្មោះ សឹង អេង ភេទស្រី អាយុ៤១ឆ្នាំ (ត្រូវជាប្អូនបង្កើត)ខណៈ នោះ ឈ្មោះ រ៉េន លីហ៊ូ អាយុ១៣ឆ្នាំ ត្រូវជាកូនបង្កើតរបស់ឈ្មោះ សឹង អេង ឃើញសភាពការណ៍បែបនេះ បានដកបង្គោល របងដើមប្រេងខ្យល់វាយទៅលើឈ្មោះ សឹង សុវណ្ណនី ត្រូវមួយព្រនង់ចំក្បាលផ្នែកខាងស្ដាំរងរបួសធ្ងន់បង្កការភ្ញាក់ផ្អើលតែម្ដង។
បច្ចុប្បន្នជនសង្ស័យនិងវត្ថុតាងត្រូវបានឃាត់ខ្លួននៅអធិការដ្ឋាននគរបាលស្រុកដើម្បីបន្តតាមច្បាប់ រីឯជនរងគ្រោះបញ្ជូនទៅព្យាបាលនៅមន្ទីរពេទ្យប្រទេសវៀតណាម ៕
ដោយ៖ សុថាន
