សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានករណីគ្រោះថ្នាក់ចរាចរណ៍បង្កឡេីងដោយរថយន្តធុនធំចំនួនពីរគ្រឿងបានបុកគ្នាពេញទំហឹងបណ្ដាលឱ្យរងការខូចខាតយ៉ាងដំណំនិងបង្កឱ្យមនុស្ស០៣នាក់រងរបួសធ្ងន់និងស្រាល ត្រូវបានក្រុមគ្រូពេទ្យជួយសង្គ្រោះដឹកយកទៅមន្ទីរពេទ្យ កាលពីរសៀលថ្ងៃទី១៧ ខែឧសភា ឆ្នាំ២០២៤ នៅតាមបណ្ដោយផ្លូវក្រវាត់ក្រុងទី៣ កែងផ្លូវលេខ១០៤ ក្នុងភូមិគងណយ សង្កាត់គងណយ ខណ្ឌដង្កោ រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនកេីតហេតុគេសង្កេតឃេីញរថយន្តម៉ាកហុីយ៉ាន់ដាយ ពណ៌ខៀវ លាយលឿង ពាក់ផ្លាកលេខ កំពង់ឆ្នាំង 3A-0598 បេីកបរដោយបុរសម្នាក់និងព្រូម្នាក់ធ្វេីដំណេីរតាមបណ្ដោយផ្លូវលេខ១០៤ ក្នុងទិសដៅពីកេីតទៅលិចក្នុងល្បឿនលឿនល្មម និងបម្រុងឆ្លងកាត់ផ្លូវក្រវាត់ក្រុង ។ លុះឆ្លងបានបន្តិចស្រាប់តែមានរថយន្តម៉ាក NISSAN ប្រភេទបែនដឹកដី ពណ៌ក្រហម លាយខៀវ ពុំមានស្លាកលេខ បេីកបរដោយបុរសម្នាក់ ធ្វេីដំណេីរតាមបណ្ដោយផ្លូវក្រវាត់ក្រុងទី៣ ក្នុងទិសដៅពីត្បូងមកជេីងក្នុងល្បឿនលឿននិងមិនប្រយ័ត្ននៅចំណុចផ្លូវបំបែកជាបួនក៏ជ្រុលទៅបុករថយន្តហុីយ៉ាន់ដាយចំទ្វារពីចំហៀងខាងឆ្វេងពេញទំហឹង បណ្ដាលឱ្យរថយន្តហុីយ៉ាន់ដាយ ខូចខាតទ្វារមួយចំហៀង រីឯរថយន្តNISSAN បែនដឹកដីរងការខូចខាតផ្នែកខាងមុខយ៉ាងដំណំ ។ ក្នុងករណីនេះដែរបានធ្វេីឲ្យតៃកុងរថយន្ត NISSAN គាបជេីងជាប់រងរបួសធ្ងន់ ព្រមទាំងភាគីរថយន្តហុីយ៉ាន់ដាយរងរបួសស្រាល០២នាក់ ។
ក្រោយកេីតហេតុភ្លាមៗ ប្រជាពលរដ្ឋបានទាក់ទងទៅក្រុមមន្ត្រីជំនាញឱ្យមកជួយគាស់ដឹកយកជនរងគ្រោះទៅសង្គ្រោះអាយុជីវិត ។ បន្ទាប់មកសមត្ថកិច្ចមូលដ្ឋានសហការជាមួយនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញចុះមកធ្វេីការវាស់វែងយករថយន្តទាំងពីរគ្រឿងទៅរក្សាទុក រង់ចាំភាគីទាំងពីរចូលខ្លួនដោះស្រាយតាមក្រោយ ៕
ដោយ ៖ ភារ៉ា ដង្កោ
