សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា អនុញ្ញាតឱ្យ លោកស្រីអ្នកឧកញ៉ា ម៉ៅ ចំណាន និង គណៈប្រតិភូសមាគមសិល្បករខ្មែរ ចូលជួបសម្តែងការគួរសម នៅវិមានព្រឹទ្ធសភា រាជធានីភ្នំពេញ ថ្ងៃអង្គារ ៦ រោច ខែពិសាខ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៨ ខែឧសភា ឆ្នាំ២០២៤ ។
សូមបញ្ជាក់ថា លោកស្រី ម៉ៅ ចំណាន ដែលមានគោរមងារជាអ្នកឧកញ៉ា និងជាភរិយារបស់អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានជាប់ឆ្នោតជាប្រធានសមាគមសិល្បករខ្មែរអណត្តិទី៦ ក្រោយពីបានទទួលសំឡេងគាំទ្រ៥២៧សំឡេង ឬស្មើនឹង៩៣% នៃចំនួនអ្នកបោះឆ្នោតជាសមាជិកប្រមាណជាង៦០០នាក់។
សមាគមសិល្បករខ្មែរបានរៀបចំការបោះឆ្នោតជ្រើសរើសប្រធានថ្មីអាណត្តិទី៦នៅរាជបណ្ឌិត្យកម្ពុជា ដែលមានសមាជិកជាសិល្បករគ្រប់ទម្រង់ប្រមាណជាង៦០០នាក់ចូលរួមការបោះឆ្នោតនោះ។
លោក សំ ជំនាញ តំណាងគណៈកម្មការរៀបចំការបោះឆ្នោតជ្រើសរើសប្រធានសិល្បករខ្មែរអាណត្តិថ្មី បានប្រាប់សារព័ត៌មានថា ការបោះឆ្នោតបានប្រព្រឹត្តទៅដោយរលូនមានតម្លាភាព និងយុត្តិធម៌ ដែលអាចជ្រើសរើសបានថ្នាក់ដឹកនាំសមាគមសិល្បករខ្មែរដែលមានសមត្ថភាពពិតប្រាកដបន្តដឹកនាំសមាគមកាន់តែរីកចម្រើន និងដើម្បីការពារប្រយោជន៍សិល្បករទូទៅ។
លោកថា បេក្ខជនឈរឈ្មោះការបោះឆ្នោតនេះ រួមមានលោកស្រី ម៉ៅ ចំណាន លោក ផាត់ តារារ័ត្ន និងលោក គួច ខេវិន ហើយជាលទ្ធផល លោកស្រី ម៉ៅ ចំណាន បានឈ្នះគូប្រជែងទាំងពីរយ៉ាងភ្លូកទឹកភ្លូកដីក្នុងសំឡេងគាំទ្រពីសិល្បករចំនួន៥២៧នាក់ឬស្មើនឹង៩៣%។
លោកបន្ថែមថា ចំណែកលោក ផាត់ ដារ៉ារដ្ឋ បានទទួលសំឡេងគាំទ្រ២៩នាក់ឬ៥% ហើយលោក គួច ខេវិន មានអ្នកបោះគាំទ្រ១១នាក់ឬស្មើ២%ប៉ុណ្ណោះ។
លោកបានបញ្ជាក់ថា៖ «ផ្អែកតាមលទ្ធផលនេះ សិល្បករបានដាក់ក្ដីរំពឹងខ្ពស់លើលោកស្រី ម៉ៅ ចំណាន ដើម្បីជំរុញការអភិវឌ្ឍសមាគមកាន់តែរីកចម្រើនបន្ថែមទៀត ដ្បិតថាលោកស្រីជាបុគ្គលដែលមានធនធានគ្រប់គ្រាន់ ដើម្បីចូលរួមចំណែកលើកកម្ពស់វិស័យសិល្បៈវប្បធម៌ជាតិ»។
លោកស្រី ម៉ៅ ចំណាន ប្រធានថ្មីនៃសមាគមសិល្បករខ្មែរបានប្ដេជ្ញាចិត្តយ៉ាងខ្លាំងក្លាចំពោះការលើកកម្ពស់វិស័យវប្បធម៌ជាតិ ជាពិសេសការទ្រទ្រង់ដល់ជីវភាពរបស់សិល្បករសិល្បការិនីដែលជួបប្រទះបញ្ហាផ្សេង។
លោកស្រីបាននិយាយថា៖ «ខ្ញុំចូលរួមចំណែកការដឹកនាំសមាគមសិល្បករខ្មែរ ដើម្បីឆ្ពោះទៅរកភាពកាន់តែរីកចម្រើនបន្ថែមទៀតទាំងពីជីវភាពសិល្បករ និងលើកកម្ពស់កិត្យានុភាពនៃវិស័យសិល្បៈខ្មែរនៅលើឆាកអន្តរជាតិ ដែលជាផ្នែកមួយសំខាន់ត្រូវប្ដេជ្ញាធ្វើ»។
សូមរម្លឹកថា : លោក អៀង ស៊ីធុល បានកាន់តំណែងជាប្រធានសមាគមអាណត្តិទី១ ហើយលោក ម៉ិញ សុធីវណ្ណ បានបន្តអាណត្តិទី២។ បន្ទាប់មកលោក សុះ ម៉ាច បានគ្រប់គ្រងសមាគមសិល្បករខ្មែរពីរអណត្តិជាប់គ្នា គឺអាណត្តិទី៣និងទី៤ ។
នៅក្នុងអាណត្តិទី៥ សមាគមនេះបានដឹកនាំដោយលោកស្រី ចន ច័ន្ទលក្ខិណា ដែលមានរយៈពេលវែងជាងគេដោយសារតែឆ្លងកាត់ដំណាក់កាលវិបត្តិកូវីដ-១៩។
គេកត់សម្គាល់ឃើញថា លោកស្រីបានធ្វើជាប្រធានសមាគមសិល្បករខ្មែរចាប់តាំងពីឆ្នាំ២០១៧ រហូតដល់ពេលដែលលោកស្រីប្រកាសលាលែងកាលពីខែកុម្ភៈកន្លងមក។
លោកស្រី ម៉ៅ ចំណាន ដែលមានគោរមងារជាអ្នកឧកញ៉ា និងជាភរិយារបស់អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជាត្រូវកាន់តំណែងជាប្រធានសមាគមសិល្បករខ្មែរអណត្តិទី៦រហូតដល់ឆ្នាំ២០២៩ ។
លោក ស៊ុំ ម៉ាប់ អ្នកនាំពាក្យក្រសួងវប្បធម៌និងវិចិត្រសិល្បករ ធ្លាប់ប្រាប់សារព័ត៌មានថា តាមលក្ខន្តិកៈរបស់សមាគមសិល្បករខ្មែរក្នុងមួយអាណត្តិមានរយៈពេល៥ឆ្នាំត្រូវបោះឆ្នោតជ្រើសរីសប្រធានថ្មីដឹកនាំបន្ត។
លោកបានមានប្រសាសន៍ថា៖ «សមាគមសិល្បករខ្មែរបានជួយយើងច្រើនទម្រង់សម្រាប់ប្រទេសជាតិ។ កន្លងមកយើងកត់សម្គាល់ឃើញតាមព្រឹត្តិការណ៍ធំៗតែងតែមានវត្តមានរបស់ពួកគាត់ចូលរួមជានិច្ច»។
លោក ប៉ុក បូរក្ស ប្រធាននាយកដ្ឋានសិល្បភាពយន្តនិងផ្សព្វផ្សាយវប្បធម៌ បានបញ្ជាក់ថា ក្រសួងវប្បធម៌និងវិចិត្រសិល្បករមានក្រុមប្រឹក្សាវិន័យនិងលើកសរសើរ ដែលធ្វើការពាក់ព័ន្ធនឹងសមាគមសិល្បករ សមាគមអ្នកនិពន្ធ និងសមាគមពិធីករពិធីការីនីជាដើម។
សូមជម្រាបជូនថា , លោកស្រី ម៉ៅ ចំណាន ប្រធានថ្មីនៃសមាគមសិល្បករខ្មែរបានចំណាយថវិកាផ្ទាល់ខ្លួន ជួយដល់សិល្បករ ដែលជួបបញ្ហាជីវភាព មានជំងឺផងដែរ ៕
ដោយ ៖ ស តារា
