សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ចៅក្រមស៊ើបសួរនៃសាលាដំបូងខេត្តកណ្តាល បានសម្រេចឃុំខ្លួនបណ្តោះអាសន្នលើជនត្រូវចោទចំនួន៦នាក់ ឈ្មោះ ជា វណ្ណាត់ ហៅ សេក ឈ្មោះ ជា សុខលីន ឈ្មោះ ជា សុខនីន ហៅ អាតឿ ឈ្មោះ ជា សុខពេជ្រ ឈ្មោះ ឈឿន ចាន់ណា ហៅ អាឡេវ និងឈ្មោះ សឿយ សារ៉ាត់ ពីបទល្មើសខាងលើ តាមមាត្រា២១៨ មាត្រា៤១០ និងមាត្រា៤៩០ នៃក្រមព្រហ្មទណ្ឌ និងមាត្រា៤៥ នៃច្បាប់ស្តីពីការត្រួតពិនិត្យគ្រឿងញៀន។ នេះបេីយោងតាមប្រភពព័ត៍មានពីសេចក្តីប្រកាសព័ត៌មានរបស់សាលាដំបូងខេត្តកណ្តាល ដែលទើបទទួលបាននៅព្រឹកថ្ងៃទី២៩ ខែឧសភា ឆ្នាំ២០២៤។
ប្រភពដដែលបន្តថា អ្នកនាំពាក្យសាលាដំបូងខេត្តកណ្តាល នៅព្រឹកថ្ងៃទី២៩ ខែឧសភានេះ មានកិត្តិយសសូមជម្រាបជូនដល់សាធារណជនមេត្តាជ្រាបថា៖ កាលពីថ្ងៃទី២៨ ខែឧសភា ឆ្នាំ២០២៤ សាលាដំបូងខេត្តកណ្តាល បានទទួលចាត់ការលើសំណុំរឿងព្រហ្មទណ្ឌ លេខ ១២១១ អ.ក ចុះថ្ងៃទី២៨ ខែឧសភា ឆ្នាំ២០២៤ ទាក់ទិននឹងករណី ហិង្សាដោយចេតនាមានស្ថានទម្ងន់ ទោស, ធ្វើឱ្យខូចខាតដោយចេតនា, កាន់កាប់អាវុធដោយគ្មានការអនុញ្ញាត និងប្រើប្រាស់ដោយខុសច្បាប់នូវ សារធាតុញៀន ដែលមានជនត្រូវចោទមានខ្លួនចំនួន ០៦នាក់ គឺ៖ ១.ឈ្មោះ ជា វណ្ណាត់ ហៅ សេក ភេទប្រុស អាយុ២១ឆ្នាំ ជនជាតិខ្មែរ ២.ឈ្មោះ ជា សុខលីន ភេទប្រុស អាយុ១៩ឆ្នាំ ជនជាតិខ្មែរ ៣.ឈ្មោះ ជា សុខនីន ហៅ អាតឿ ភេទប្រុស អាយុ១៩ឆ្នាំ ជនជាតិខ្មែរ ៤.ឈ្មោះ ជា សុខពេជ្រ ភេទប្រុស អាយុ២១ឆ្នាំ ជនជាតិខ្មែរ ៥.ឈ្មោះ ឈឿន ចាន់ណា ហៅ អាឡេវ ភេទប្រុស អាយុ១៩ឆ្នាំ ជនជាតិខ្មែរ និង ៦.ឈ្មោះ ត្រើយ សារ៉ាត់ ភេទប្រុស អាយុ ២៥ឆ្នាំ ជនជាតិខ្មែរ ត្រូវចោទប្រកាន់ពីបទ ហិង្សាដោយចេតនាមានស្ថានទម្ងន់ទោស, ធ្វើឱ្យខូចខាតដោយ ចេតនា, កាន់កាប់អាវុធដោយគ្មានការអនុញ្ញាត និងប្រើប្រាស់ដោយខុសច្បាប់នូវសារធាតុញៀន ប្រព្រឹត្តនៅភូមិ ពោធិកំបោរ ឃុំវិហារលួង ស្រុកពញាឮ ខេត្តកណ្តាល កាលពីថ្ងៃទី២៦ ខែឧសភា ឆ្នាំ២០២៤ បទល្មើសព្រហ្មទណ្ឌ ដែលមានចែង និងផ្តន្ទាទោសតាមបញ្ញត្តិមាត្រា ២១៨, មាត្រា ៤១០ និងមាត្រា ៤៩០, នៃក្រមព្រហ្មទណ្ឌ និងមាត្រា ៤៥ នៃច្បាប់ស្តីពីការត្រួតពិនិត្យគ្រឿងញៀន។
បន្ទាប់ពីបានពិនិត្យទៅលើឯកសារ និងភស្តុតាងនានាដែលមាននៅក្នុងសំណុំរឿង ចៅក្រមស៊ើបសួរនៃ សាលាដំបូងខេត្តកណ្តាល បានសម្រេចឃុំខ្លួនបណ្តោះអាសន្នលើជនត្រូវចោទឈ្មោះ ជា វណ្ណាត់ ហៅ សេក, ឈ្មោះ ជា សុខលីន, ឈ្មោះ ជា សុខនីន ហៅ អាតឿ, ឈ្មោះ ជា សុខពេជ្រ, ឈ្មោះ ឈឿន ចាន់ណា ហៅ អាឡេវ និងឈ្មោះ ត្រើយ សារ៉ាត់ នៅពន្ធនាគារខេត្តកណ្តាល ដើម្បីបន្តកិច្ចស៊ើបសួរតាមនីតិវិធីច្បាប់៕
ដោយ៖ តារា
