សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នារសៀលថ្ងៃទី២៩ ខែឧសភា ឆ្នាំ២០២៤ ម្សិលមុិញ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានចូលរួមស្តាប់បទបង្ហាញរបស់អាជ្ញាធរជាតិប្រយុទ្ធប្រឆាំងគ្រឿងញៀនទាក់ទងនឹងការធ្វើតេស្តរកសារធាតុញៀន នៅទីស្តីការក្រសួងកសិកម្ម។
បន្ទាប់ពីបានស្តាប់បទបង្ហាញ លោករដ្ឋមន្ត្រី បានណែនាំឱ្យបង្កើតគណៈកម្មាការរៀបចំ និងគ្រប់គ្រងការងារធ្វើតេស្តរកសារធាតុញៀននេះ ដើម្បីសិក្សាឱ្យបានច្បាស់លាស់ពីនីតិវិធីការងារដើម្បីឈានទៅអនុវត្តបានត្រឹមត្រូវ និងប្រកបដោយប្រសិទ្ធភាព។
គិតមកដល់ពេលនេះ ឃើញមានមន្រ្តីរាជការស៊ីវិល បានចាប់ផ្តើមធ្វើតេស្តរកសារធាតុញៀនជាបណ្តើរៗ ដើម្បីបញ្ជាក់ពីភាពស្អាតស្អំមិនប្រើប្រាស់គ្រឿងញៀន ឬមិនជាប់ពាក់ព័ន្ធនឹងគ្រឿងញៀនខុសច្បាប់។
សូមបញ្ជាក់ថា ៖ ការធ្វើតេស្តរហ័សរកសារធាតុញៀនសម្រាប់មន្ត្រីរាជការ ធ្វើឡើងតាមបទបញ្ជារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃរាជរដ្ឋាភិបាលកម្ពុជា លេខ០១ បប ចុះថ្ងៃទី២០ ខែកុម្ភៈ ឆ្នាំ២០២៤ ស្តីអំពីការដាក់ចេញវិធានការម៉ឺងម៉ាត់ក្នុងការប្រយុទ្ធប្រឆាំងគ្រឿងញៀនខុសច្បាប់នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ៕
ដោយ ៖ សិលា
