អគ្គិភ័យឆេះផ្ទះប្រជាពលរដ្ឋមួយល្វែងក្នុងបុរីសុខចំរេីន ខូចខាតរថយន្តចំនួនមួយគ្រឿង ម៉ូតូចំនួន៤គ្រឿងរួមទាំងសម្ភារមួយចំនួន

ភ្នំពេញ៖ រថយន្តមួយគ្រឿងនិងម៉ូតូ ចំនួន៤គ្រឿងរួមទាំងសម្ភារមួយចំនួនទៀតត្រូវបានរងការខូចខាតក្នុងហេតុការណ៍គ្រោះអគ្គិភ័យឆាបឆេះផ្ទះប្រជាពលរដ្ឋមួយល្វែងក្នុងបុរីសុខចំរើនបង្កការភ្ញាក់ផ្អើលកាលពីវេលាម៉ោង៣និង១៥នាទីទៀបភ្លឺឈានចូលថ្ងៃទី១៣ ខែមិថុនា ឆ្នាំ២០២៤ នៅចំណុចក្នុងបុរីសុខចំរេីនក្នុងភូមិទួលតាឡាត់ សង្កាត់កំបូល ខណ្ឌកំបូល រាជធានីភ្នំពេញ។

បើតាមការបញ្ជាក់ពីម្ចាស់ផ្ទះបានឱ្យដឹងថា មុនពេលកើតហេតុដោយពួកគាត់កំពុងតែ សម្រាន្តលង់លក់ស្រាប់តែឮសូរសំឡេងផ្ទុះចេញពីក្នុងផ្ទះរួចបង្កទៅជាអណ្តាតភ្លើងឆេះរាលដាលយ៉ាងសន្ធោសន្ធៅ។ពេលនោះដែរពួកគាត់និងអ្នកក្បែរខាងនាំគ្នាទាញទុយយោទឹកនិងបំពង់ពន្លត់អគ្គិភ័យបាញ់ទប់ស្កាត់បឋម រួចនាំគ្នាទាក់ទងទៅសមត្ថកិច្ចមូលដ្ឋានសុំរថយន្តពន្លត់អគ្គិភ័យឲ្យមកជួយអន្តរាគមន៍បាញ់ទឹកពន្លត់ជាបន្ទាន់។ ភ្លាមៗនោះដែរខាងកម្លាំងជំនាញបង្ការពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញ រួមសហការជាមួយខាងរថយន្តពន្លត់អគ្គិភ័យ របស់អង្គភាព ៧១១ កងពលតូចលេខ៧០ បានទទួលដំណឹងខាងលើក៏ចេញរថយន្តពន្លត់អគ្គិភ័យចុះមកជួយបាញ់ទឹកពន្លត់ភ្លាមៗផងដែរ។ 

ក្រោយពីខាងជំនាញបាញ់ទឹកពន្លត់ចប់អស់រយៈពេលជាង៣ម៉ោងឃើញថារលត់ទៅវិញជាស្ថាពរ ហើយនៅក្នុងនោះដែរឃើញថា ខូចខាតផ្ទះមួយល្វែង ម៉ូតូចំនួន៤គ្រឿងនិងរថយន្តមួយគ្រឿងឆេះអស់ទាំងស្រុង ប៉ុន្តែមិនមានអ្នកស្លាប់និងរបួសនោះទេ។ ចំពោះករណីអគ្គិភ័យនេះសមត្ថកិច្ចកំពុងស្រាវជ្រាវបន្ត៕

ដោយ៖សុខាសែនជ័យ