🔥Update៖ អគ្គិភ័យឆេះឃ្លាំងស្តុកផ្ទាំងប៉ាណូខូចខាតទាំងស្រុងរួមនឹងម៉ូតូ២គ្រឿង

ភ្នំពេញ ៖ អគ្គិភ័យបានឆាបឆេះឃ្លាំងស្តុក សម្ភារៈ ស្លាកផ្ទាំងប៉ាណូមួយកន្លែងយ៉ាងសន្ធោសន្ធៅ ខូចខាតទាំងស្រុងអស់ទាំងម៉ូតូចំនួន២គ្រឿងទៀត ខណៈដែលក្រុមជាង កម្មករកំពុងធ្វើការងារនៅអគារខាងមុខ បង្កឱ្យភ្ញាក់ផ្អើលដល់សមត្ថកិច្ច អាជ្ញាធរហៅរថយន្តពន្លត់អគ្គិភ័យជាច្រើនគ្រឿងចេញទៅធ្វើអន្តរាគមន៍ កាលពីវេលាម៉ោង១០និង៣០នាទីព្រឹក ថ្ងៃទី១៤ ខែមិថុនា ឆ្នាំ២០២៤ នៅក្រុមហ៊ុនធ្វើស្លាកយុីហោ ប៉ាណូផ្សាយពាណិជ្ជកម្មមួយកន្លែងក្នុងភូមិបែកបក សង្កាត់គោករកា ខណ្ឌព្រែកព្នៅ រាជធានីភ្នំពេញ ។

ឃ្លាំងដែលត្រូវភ្លើងឆាបឆឆេះសង់ពីគ្រោងដែក ប្រក់ស័ង្កសីទំហំ១២ម៉ែត្រx៣០ម៉ែត្រ មានម្ចាស់ឈ្មោះ ជា សុគន្ធ ភេទប្រុស អាយុ៤៥ឆ្នាំ អ្នកគ្រប់គ្រងឈ្មោះ សាម ភក្តី រងការខូចខាតអស់ឃ្លាំងស្តុកមួយខ្នងទាំងស្រុងរួមទាំងសម្ភារៈ ។

តាមសមត្ថកិច្ចបានឱ្យដឹងថា ទីតាំង ក្រុមហ៊ុនតម្លើងស្លាកយីហោ ផ្ទាំងប៉ាណូ ផ្សាយពាណិជ្ជកម្មខាងលើជាកន្លែងផលិត និងដំឡើង មាន៣ខ្នង និងឃ្លាំងមួយខ្នងនៅផ្នែកខាងក្រោយ មានកម្មករ ជាង ចំនួន៩នាក់ ហើយមុនកើតហេតុ ខណៈដែលឃ្លាំងខាងក្រោយបិទទ្វារ ម្ចាស់រៀបនឹងចេញទៅខេត្ត ហើយក្រុមជាងក៏កំពុងធ្វើការងារនៅអគារខាងមុខ ស្រាប់តែទុស្សេខ្សែភ្លើងចេញពីបន្ទប់សម្រាក ឆេះខ្សែរាលចូលដល់ក្នុងឃ្លាំងស្តុកផ្នែកខាងក្រោយ ដោយសារមានគ្រឿងឈើ ក្តារកុងប្លាកេផង ភ្លើងឆេះកាន់តែខ្លាំងឡើង បង្កឱ្យផ្អើលឆោឡោដល់កម្លាំងអាជ្ញាធរ សមត្ថកិច្ច រថយន្តពន្លត់អគ្គិភ័យ របស់ស្នងការដ្ឋានក្រុងភ្នំពេញ និងរថយន្តការិយាល័យបង្ការនិងពន្លត់អគ្គិភ័យ ចំនួន១១គ្រឿងចេញទៅជាបន្តបន្ទាប់ ដើម្បីពន្លត់ភ្លើង ។

ឃ្លាំងស្តុកសម្ភារៈមួយខ្នង ត្រូវបានអគ្គិភ័យឆាបឆេះរងខូចខាតអស់ទាំងស្រុង ឆេះអស់ម៉ូតូចំនួន២គ្រឿង សង់កូរ៉េមួយគ្រឿង ម៉ាកស៊ូរ៉ូសមួយគ្រឿង តែមិនបង្កឱ្យអ្នកណារងរបួសឡើយ ៕

ដោយ៖សុខាសែនជ័យ