ក្បួនដង្ហែរសពរបស់អតីតអនុប្រធានាធិបតីម៉ាឡាវីបានបុកហ្វូងមនុស្សស្លាប់៤នាក់

ចែករំលែក៖

ក្បួនរថយន្តដែលដឹកមឈូសរបស់អនុប្រធានាធិបតីប្រទេសម៉ាឡាវី លោក Saulos Chilima ជាអកុសលបានបុកហ្វូងមនុស្ស ជាឧបទ្ទវហេតុមួយដែលបានសម្លាប់មនុស្ស៤នាក់និងរបួស១២នាក់ផ្សេងទៀត។
យោងតាមសារព័ត៌មាន Malawi កាលពីថ្ងៃទី 16 ខែមិថុនា ក្បួនរថយន្តដែលដឹកមឈូសរបស់អនុប្រធានាធិបតី Saulos Chilima ដែលបានស្លាប់ក្នុងឧប្បត្តិហេតុធ្លាក់យន្តហោះកាលពីពេលថ្មីៗនេះ បានជ្រុលចូលទៅក្នុងហ្វូងមនុស្សនៅក្នុងភូមិ Ntcheu កណ្តាលប្រទេស Malawi ។
ប៉ូលិសក្នុងតំបន់បាននិយាយថា ក្បួនរថយន្តដឹកមឈូសរបស់លោក Chilima កំពុងធ្វើដំណើរទៅកាន់ភូមិ Nsipe (ស្រុកកំណើតរបស់លោក Chilima) ដើម្បីរៀបចំពិធីបុណ្យសព។ មនុស្សមួយចំនួនធំបានប្រមូលផ្តុំគ្នានៅលើដងផ្លូវ ហើយបានសុំឱ្យក្បួនរថយន្តឈប់ដើម្បីមើលមឈូសរបស់លោក Chilima ដែលនាំឱ្យកើតមានឧបទ្ទវហេតុដែលមិននឹកស្មានដល់។
ប៉ូលិសម៉ាឡាវីបានប្រកាសថា “គ្រោះថ្នាក់នេះបានសម្លាប់មនុស្ស 4 នាក់ រួមទាំងស្ត្រីមានផ្ទៃពោះម្នាក់។ មនុស្ស 12 នាក់ផ្សេងទៀតបានរងរបួស និងកំពុងសម្រាកព្យាបាលនៅមន្ទីរពេទ្យ” ។
លោក Felix Njawala តំណាងគណបក្ស UTM របស់លោក Chilima បានអំពាវនាវឱ្យមានភាពស្ងប់ស្ងាត់ក្នុងគណបក្ស។ លោក Njawala បាននិយាយថា “លោក Chilima គឺជាបុរសសន្តិភាព យើងត្រូវតែចងចាំគាត់តាមរបៀបដូចគ្នា”។
ប្រព័ន្ធផ្សព្វផ្សាយក្នុងស្រុកបាននិយាយថា ឧបទ្ទវហេតុខាងលើបានប៉ះពាល់យ៉ាងខ្លាំងដល់ពិធីបុណ្យសពរបស់លោក ឈី លីម៉ា ប៉ុន្តែមន្ត្រីជាន់ខ្ពស់នៃ UTM ធានាថានឹងរៀបចំពិធីដោយសន្តិវិធីសម្រាប់អតីតអនុប្រធាន៕