សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នាឱកាសបើកការដា្ឋនសាងសង់ស្ពានអាកាសភ្លោះ ចំណុចប្រសព្វមហាវិថីសម្ដេចតេជោ ហ៊ុន សែន និងផ្លូវជាតិលេខ២ ស្ថិតនៅព្រំប្រទល់រាជធានីភ្នំពេញ និងខេត្តកណ្តាល នាព្រឹកថ្ងៃទី១៧ ខែមិថុនា ឆ្នាំ២០២៤ម្សិលមុិញ សម្ដេចធិបតីនាយករដ្ឋមន្ត្រី ហ៊ុន ម៉ាណែត នាយករដ្ឋមន្ត្រី នៃកម្ពុជា បានធ្វើការណែនាំឲ្យមានច្បាប់ស្តីពីស្តង់ដារសុវត្ថិភាពសំណង់។
ការថ្លែងរបស់សម្តេចបែបនេះ ក្នុងគោលបំណងដើម្បីការពារសុវត្ថិភាពពីការកើតឡើងជាយថាហេតុនៃការផ្ទុះបង្កើតឲ្យមានអគ្គិភ័យនៅតាមទីតាំងសំណង់នានា ព្រោះថាថ្ងៃក្រោយទៅអគារខ្ពស់ៗនឹងប្រើប្រាស់ប្រព័ន្ធហ្គាសច្រើន ដូច្នេះសំណង់ត្រូវមានប្រព័ន្ធសុវត្ថិភាពខ្ពស់។
បន្ថែមពីនេះ សម្តេចធិបតី ក៏បានណែនាំឲ្យក្រសួងស្ថាប័នពាក់ព័ន្ធគិតគូរបុរេសកម្មទៅលើរឿងសំណង់ ធ្វើយ៉ាងណាឲ្យមានប្រព័ន្ធសុវត្ថិភាពស្តង់ដារមួយក្នុងអគារ ទាំងភ្លើង ទាំងទឹក ទាំងហ្គាស ដែលត្រូវរៀបចំបង្គុំដើម្បីដាក់ចូលទៅក្នុងការរៀបចំផែនការ ឬគោលការណ៍សុវត្ថិភាពសំណង់ ព្រោះថាវាជារឿងសំខាន់ និងជាសុខសុវត្ថិភាពរបស់ប្រជាពលក្នុងការរស់នៅ ។
សម្តេចធិបតី បានឲ្យដឹងទៀតថា នាពេលអនាគត នឹងអាចមានក្រុមហ៊ុនផ្គត់ផ្គង់ហ្គាសទៅតាមតំបន់ ដែលមានការរៀបចំ ដូចប្រព័ន្ធខ្សែកាប និងប្រព័ន្ធទឹកដូច្នោះដែរ។ ដោយហេតុនេះ បើសិនជាប្រតិបត្តិករលក់ហ្គាស អត់មានសុវត្ថិភាព អត់មានស្តង់ដារទេ គឺនឹងប្រឈមនឹងគ្រោះថ្នាក់ខ្ពស់។ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានប្រកាសថាទៅថ្ងៃមុខគឺនឹងមានក្រុមហ៊ុនផ្គត់ផ្គង់ហ្គាសនៅតាមតំបន់ដែលបានតប្រព័ន្ធហ្គាសទៅដល់ផ្ទះប្រជាពលរដ្ឋដោយផ្ទាល់តែម្ដង។
សម្ដេចធិបតីបានថ្លែងថា៖ «ថ្ងៃក្រោយគឺមានក្រុមហ៊ុនមួយផ្គត់ផ្គង់ហ្គាសជាតំបន់ គាត់រៀបចំប្រព័ន្ធមួយគឺដូចជាប្រព័ន្ធទឹកឥឡូវអញ្ចឹង»។
សម្ដេចបានណែនាំទៅដល់ក្រសួងរ៉ែនិងថាមពល ឲ្យគិតគូរអំពីផែនការនិងច្បាប់បទដ្ឋានឲ្យរួចរាល់ឲ្យហើយដើម្បីធានាសុវត្ថិភាពដល់ពលរដ្ឋពេលដែលមានការផ្គត់ផ្គងហ្គាសបែបនេះ៕
ដោយ ៖ សិលា
