សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្នុងសន្និសីទសារព័ត៌មាននៅថ្ងៃទី២៦ ខែមិថុនា ឆ្នាំ២០២៤ ករណីឃាតកម្មប្រព្រឹត្តដោយជនល្មើស ឈ្មោះ ស្រី ស៊ីណា នៅទីស្តីការក្រសួងយុត្តិធម៌ លោក កើត រិទ្ធ បានអរគុណចំពោះបងប្អូនជនរួមជាតិទាំងអស់ ក៏ដូចជាអ្នកសិក្សាស្រាវជ្រាវ និងអ្នកច្បាប់នានាដែលបានជួយតាមដានរឿងនេះ និងបញ្ចេញមតិយោបល់វែកញែកដោយសុទ្ធចិត្តពាក់ព័ន្ធនឹងសំណុំរឿងនេះប្រកបដោយសីលធម៌ និងសេចក្តីថ្លៃថ្នូរ ក្នុងគោលបំណងឈឺឆ្អាលដោយពិតប្រាកដចំពោះជនរងគ្រោះ និងក្រុមគ្រួសារជនរងគ្រោះនៅក្នុងសំណុំរឿងនេះ ក៏ដូចជាឆ្លុះបញ្ចាំងនូវគំនិតស្ថាបនានូវចំនុចខ្វះខាតនានាដែលមាននៅក្នុងក្រមព្រហ្មទណ្ឌនៃព្រះរាជាណាចក្រកម្ពុជា។
ទន្ទឹមនេះ លោករដ្ឋមន្ត្រី ក៏មានការខកចិត្តចំពោះអ្នកឆ្លៀតឱកាសដើម្បីផលប្រយោជន៍ផ្ទាល់ខ្លួនមួយចំនួន ដែលបានធ្វើការផ្សព្វផ្សាយព័ត៌មានមិនពិត នាំឲ្យមានការភ័ន្តច្រឡំក្នុងចំណោមមហាជន ក៏ដូចជាបំភ្លៃការពិតទាំងស្រុងដោយគ្មានការទទួលខុសត្រូវ។
ជាក់ស្ដែង ការលើកឡើងថា “ករណីនេះជាប់គុកតែពី១០ ទៅ១៥ឆ្នាំ” គឺជាការបង្កើតឲ្យមានការភ័ន្តច្រឡំតាំងពីថ្ងៃទី១។ យើងឃើញថាព័ត៌មានរបស់អយ្យការអមសាលាដំបូងរាជធានីភ្នំពេញ គឺបញ្ជាក់ច្បាស់ហើយថា ឈ្មោះ ស្រី ស៊ីណា នេះត្រូវបានចោទប្រកាន់ក្នុងសំណុំរឿង២ ដាច់ដោយឡែកពីគ្នា ដែលមានន័យថា “សាលក្រម២ ដាច់ដោយឡែកពីគ្នា”។ អ៊ីចឹង បើសាលក្រមមួយអាចមានទោសរហូតដល់១៥ឆ្នាំ តើអាចយើងអាចនិយាយបានទេថាជននេះមានទោសត្រឹម១៥ឆ្នាំអត់? បើមានសាលក្រមពីរ?
ដូចនេះ វាជាការលើកឡើងតែមួយជ្រុងហើយបន្ទរតាមគ្នា ហើយការបន្ទរតាមគ្នានេះក៏ចេះតែធ្វើបន្តទៅទៀតបង្កើតឲ្យមានការភ័ន្តច្រឡំកាន់តែខ្លាំង ទោះបីជាមានសេចក្តីប្រកាសព័ត៌មានរបស់សាលាដំបូង និងអយ្យការអមសាលាដំបូងរាជធានីភ្នំពេញហើយក៏ដោយ។
លោក កើត រិទ្ធ បានបញ្ជាក់ទៀតថា ផ្អែកលើការពិតនៃទិដ្ឋភាពច្បាប់ ករណីនៃការបាញ់ប្រហារនេះត្រូវបានចោទប្រកាន់ក្នុងសំណុំរឿងចំនួន២ ដាច់ដោយឡែកពីគ្នា ហើយដែលសំណុំរឿងនីមួយៗអាចប្រឈមនឹងការផ្តន្ទាទោសដាក់ពន្ធធនាគារពី១០ ទៅ ១៥ឆ្នាំ។ ដូច្នេះ ឯកឧត្តម បានស្នើសុំម្តងហើយម្តងទៀតដល់អ្នកសារព័ត៌មាន និងបងប្អូនជនរួមជាតិដែលប្រើប្រាស់បណ្តាញសង្គម ឬ Facebook មេត្តាជួយផ្សព្វផ្សាយព័ត៌មានឱ្យបានពិតប្រាកដនិងត្រឹមត្រូវ ដើម្បីចៀសវាងការភ័ន្តច្រឡំក្នុងចំណោមសាធារណៈមតិ។
ឆ្លៀតក្នុងឱកាសនោះ លោករដ្ឋមន្រ្តីក្រសួងយុត្តិធម៌ ក៏សូមអរគុណដល់អយ្យការអមសាលាដំបូងរាជធានីភ្នំពេញ ដែលបានបំបែកសំណុំរឿង តាមផ្លូវច្បាប់គេចោទប្រកាន់តែមួយសំណុំរឿងក៏បានដែរ ហើយអ្នកប្រើ Facebook ខ្លះលើកឡើងថា រឿងនេះត្រូវដាក់ទោសឲ្យធ្ងន់ ប៉ុន្តែគាត់ដាក់សំណួរមួយថាហេតុអីបានជាអយ្យការបំបែកសំណុំរឿងធ្វើអី? បើមិនបំបែកយ៉ាងម៉េចបានធ្ងន់ គាត់ប្រហែលជាបំបែកក្នុងគោលដៅហ្នឹង។
ម្យ៉ាងវិញទៀត លោករដ្ឋមន្ត្រី ចង់យកជ្រុងមួយមកបញ្ជាក់ថា យើងខ្ញុំក្នុងវិស័យនេះ ក៏ដូចជាបងប្អូនអ្នកសារព័ត៌មាន ក៏ដូចជាជនរួមជាតិទាំងអស់មានការខឹងសម្បារចំពោះការបាញ់ប្រហារបែបនេះក្នុងសង្គមជាតិយើង ហើយក៏មានការឈឺឆ្អាលរកយុត្តិធម៌ជូនដល់ជនរងគ្រោះដែរ ប៉ុន្តែយើងមិនអាចធ្វើទៅតាមអារម្មណ៍និងចិត្តរបស់យើងទេ គឺយើងធ្វើទៅតាមបច្ចេកទេសនីតិវិធី។ ដូច្នេះរឿងនេះប្រសិនបើគេចោទប្រកាន់តែមួយសំណុំរឿង វាបានតែមួយសំណុំរឿង ១៥ឆ្នាំមិនខុសទេ ប៉ុន្តែគាត់បំបែកសំណុំរឿងជា២ តាំងពីថ្ងៃដំបូងមកម៉្លេះ។ អ្វីដែលក្តៅគគុក គឺ រដ្ឋមន្រ្ដីក្រសួងយុត្ដិធម៌ នឹងស្នើដាក់ឈ្មោះ ស្រី ស៊ីណា ទៅក្នុងបញ្ជីជនឧក្រិដ្ឋជនសាហាវៗ ដែលមិនអាចបន្ធូរបន្ថយទោសបានឡើយ ។
លោកឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌ និងស្នើទៅគណៈកម្មការជាតិ ពិនិត្យនិងវាយតម្លៃបញ្ជីឈ្មោះទណ្ឌិតសុំបន្ធូបន្ថយទោសនិងលើកលែងទោស ដាក់ឈ្មោះ អតីតឧកញ៉ា ស្រី ស៊ីណា ទៅក្នុងបញ្ជីឧក្រិដ្ឋជនសាហាវៗ ដែលមិនអាចទទួលបានការស្នើសុំបន្ធូរបន្ថយទោស និងលើកលែងទោសបាន។
លោកឧបនាយករដ្ឋមន្ត្រី កើត រិទ្ធ បានលើកឡើងថា ក្នុងនាមជារដ្ឋមន្រ្ដីមន្រ្ដីក្រសួងយុត្ដិធម៌ និងជាប្រធានគណៈកម្មការជាតិ ពិនិត្យនិងវាយតម្លៃបញ្ជីឈ្មោះទណ្ឌិតសុំបន្ធូបន្ថយទោសនិងលើកលែងទោស លោកនឹងស្នើសុំទៅគណៈកម្មការជាតិ ដើម្បីដាក់ឈ្មោះ ស្រី ស៊ីណា ទៅក្នុងបញ្ជីជនឧក្រិដ្ឋជនសាហាវៗ ដែលមិនអាចទទួលបានការស្នើសុំបន្ធូរបន្ថយទោស និងលើកលែងទោសបានឡើយ។
លោកឧបនាយករដ្ឋមន្ត្រី កើត រិទ្ធ បានបន្ដថា ការធ្វើបែបនេះ គឺដើម្បីធានាថា អំពើសម្លាប់មនុស្សដ៏សាហាវបែបនេះត្រូវទទួលរងការអនុវត្ដទោសជាប់ពន្ធនាគារឱ្យបានធ្ងន់ធ្ងរ ស័ក្តិសមទៅនឹងទង្វើដែលខ្លួនបានប្រព្រឹត្ដ ស្របតាមគោលការណ៍ក្នុងវិស័យយុត្ដិធម៌។
រដ្ឋមន្រ្ដីក្រសួងយុត្ដិធម៌ បានបញ្ជាក់ថា តាមផ្លូវច្បាប់ កាលណាទណ្ឌិតអនុវត្ដទោសបាន ១/៣ ហើយ គេមានសិទ្ធស្នើសុំបន្ធូរបន្ថយទោស ប៉ុន្ដែគណៈកម្មការជាតិក៏មានសិទ្ធក្បៀសនូវទណ្ឌិតដែលសាហាវៗមួយចំនួនដូចជា ករណីភេរវកម្ម ករណីរំលោភបំពានផ្លូវភេទលើអនិតិជនជាដើម មិនឱ្យទទួលបានការបន្ធូបន្ថយទោសបានដែរ៕
ដោយ ៖ សិលា
