🔥Update ៖ អគ្គិភ័យឆេះផ្ទះមួយកន្លែងកើតឡើងក្នុងសង្កាត់អូរឫស្សី១ ខណ្ឌ៧មករា

ភ្នំពេញ ៖ អគ្គិភ័យបានឆាបឆេះផ្ទះនៅជាន់ទី១ ក្នុងសង្កាត់អូរឫស្សីទី១ បង្កការខូចខាតផ្ទះស្ទើរតែទាំងស្រុងរួមជាមួយនឹងសម្ភារៈមួយចំនួនផងដែរ តែមិនបានឆេះរាលដាលដល់ផ្ទះអ្នកជិតខាង ឬក៏ធ្វើឱ្យនរណារងរបួសនោះឡើយ ។ 

គ្រោះអគ្គិភ័យខាងលើនេះបង្កការភ្ញាក់ផ្អើលកាលពីវេលាម៉ោង១០និង ៤៥នាទីព្រឹកថ្ងៃទី ១៥ ខែកក្កដា ឆ្នាំ២០២៤ នៅចំណុចផ្ទះជាន់ទី១ តាមបណ្តោយផ្លូវលេខ១៧០ ក្នុងសង្កាត់អូរឫស្សីទី១ ខណ្ឌ៧មករា រាជធានីភ្នំពេញ។

បើតាមប្រភពព័ត៌មានពីប្រជាពលរដ្ឋនៅក្បែរខាងបានអោយដឹងថា គេធុំក្លិនឈ្ងៀមចេញពីផ្ទះកើតហេតុ និងមានលាយឡំផ្សែងហុយខ្មៅខ្មួលខ្មាញ់ហុយចេញមកក្រៅ ។ ភ្លាមៗនោះ ក៏មានសំឡេងស្រែកចេញពីខាងក្នុងផ្ទះដែលឆាបឆេះ ទើបបង្កអោយមានការឆោឡោដល់ប្រជាពលរដ្ឋរាយការណ៍ជូនទៅសមត្ថកិច្ចដើម្បីអោយសមត្ថកិច្ចជួយបន្តទាក់ទងទៅមន្រ្តីជំនាញបង្ការនិងពន្លត់អគ្គិភ័យមកជួយអន្តរាគមន៍បាញ់ទឹកពន្លត់ជៀសវាងមានការឆេះរាលដាល ។

បន្តិចក្រោយមកក៏ឃើញវត្តមានលោក ថេង សុថុល អភិបាលខណ្ឌ៧មករា រួមជាមួយនឹងមន្រ្តីក្រោមឱវាទបានចុះមកត្រួតពិនិត្យផ្ទាល់នៅកន្លែងកើតហេតុផងដែរ ។

អគ្គិភ័យខាងលើបានឆាបឆេះផ្ទះជាន់ទី១ប្រភេទថ្មបេតុងស្ទើរទាំងស្រុងរួមជាមួយសម្ភារៈមួយចំនួនផងដែរ តែមិនបង្កអោយនរណារងរបួសនោះឡើយ នឹងមិនមានការឆេះដាលដល់ផ្ទះអ្នកដទៃនោះឡើយ ហើយក្នុងប្រតិបត្តិការខាងលើនេះ រថយន្តបង្ការនិងពន្លត់អគ្កិភ័យនៃស្នងការដ្ឋាននគរបាលរាជធានីភ្នំពេញបានមកដល់ទីតាំងកើតហេតុចំនួន០៨គ្រឿង និងរថយន្តពន្លត់អគ្គិភ័យរបស់ទីក្រុងអូឡាំព្យា៉ចំនួន០២គ្រឿង ប្រើប្រាស់ទឹកអស់ចំនួន០៥ឡាន បាញ់រលត់ជាស្ថាពរ ។ ចំពោះមូលហេតុ សមត្ថកិច្ចកំពុងធ្វើការស្រាវជ្រាវ ៕ 

ដោយ ៖ ជីណា