អាមេរិកបារម្ភថា រុស្ស៊ីអាចចែករំលែកជាមួយចិននូវបទពិសោធន៍ប្រឆាំងនឹងអាវុធរបស់អាមេរិក

ចែករំលែក៖

ប្រទេសចិនកំពុងសិក្សាលម្អិតអំពីបទពិសោធន៍នៃប្រតិបត្តិការយោធានៅអ៊ុយក្រែន។ សភាអាមេរិកព្រួយបារម្ភថា រុស្ស៊ីអាចចែករំលែកបទពិសោធន៍ប្រឆាំងអាវុធរបស់អាមេរិកជាមួយចិន។

គណៈកម្មាធិការ bipartisan នៃសភាអាមេរិកបានអំពាវនាវឱ្យសេតវិមានបញ្ចេញរបាយការណ៍លម្អិតមួយថាតើរុស្ស៊ីបានចែករំលែកព័ត៌មានជាមួយចិនអំពីរបៀបកម្ចាត់អាវុធរបស់អាមេរិកដែលប្រើក្នុងសមរភូមិនៅអ៊ុយក្រែនដែរឬទេ។
គណៈកម្មាធិការសភាអាមេរិកស្តីពីការប្រកួតប្រជែងជាយុទ្ធសាស្ត្ររវាងអាមេរិកនឹងចិនបាននិយាយថា បច្ចេកវិទ្យាសមរភូមិរបស់រុស្ស៊ីដែលបន្សាបប្រព័ន្ធសព្វាវុធរបស់អាមេរិកមួយចំនួន “ទំនងជានឹងត្រូវបានចែករំលែក” ជាមួយប្រទេសចិន។ ជាឧទាហរណ៍ វិធានការតបតរបស់រុស្សីពាក់ព័ន្ធនឹងប្រភេទគ្រាប់បែកដែលដឹកនាំដោយភាពជាក់លាក់របស់អាមេរិក។
ប្រធានគណៈកម្មាធិការសាធារណរដ្ឋ លោក John Moolenaar និងមន្ត្រីជាន់ខ្ពស់គណបក្សប្រជាធិបតេយ្យ Raja Krishnamoorthi បានសរសេរក្នុងសំបុត្រថា “យើងគួរតែគិតទុកជាមុន ហើយគួរតែធ្វើសកម្មភាពតាមការសន្មត់ថារុស្ស៊ីកំពុងបញ្ជូនព័ត៌មានអំពីភាពងាយរងគ្រោះ ឬវិធានការប្រឆាំងនឹងប្រព័ន្ធអាវុធរបស់សហរដ្ឋអាមេរិក និងសម្ព័ន្ធមិត្តសម្រាប់ប្រទេសចិន”។
សមាជិកសភាអាមេរិកបានលើកឡើងពីរបាយការណ៍ប្រព័ន្ធផ្សព្វផ្សាយនិងការវិភាគដោយអង្គការស្រាវជ្រាវអំពីការគាំទ្ររបស់ចិនសម្រាប់ឧស្សាហកម្មយោធារបស់រុស្ស៊ី និង “កម្រិតនៃការសម្របខ្លួនដ៏គួរឱ្យព្រួយបារម្ភរបស់រុស្ស៊ីបានធ្វើឱ្យចុះខ្សោយនូវប្រសិទ្ធភាពនៃប្រព័ន្ធអាវុធមួយចំនួនពីសហរដ្ឋអាមេរិក។
ពួកគេក៏បានស្នើសុំទីប្រឹក្សាសន្តិសុខជាតិសេតវិមានលោក Jake Sullivan ឱ្យវាយតម្លៃសមត្ថភាពរបស់រុស្ស៊ីក្នុងការទប់ទល់នឹងអាវុធរបស់សហរដ្ឋអាមេរិកដែលដាក់ពង្រាយនៅអ៊ុយក្រែន និងទំហំដែលទីក្រុងម៉ូស្គូចែករំលែក “មេរៀន” ទាំងនេះជាមួយប្រទេសចិន។
ពួកគេក៏បានទាមទារឱ្យមានការវាយតម្លៃលើកិច្ចខិតខំប្រឹងប្រែងយោធាចិនណាមួយដើម្បី “ចម្លង” ការច្នៃប្រឌិតយោធារុស្ស៊ី។ តាមទស្សនៈរបស់ពួកគេ នៅទីក្រុងប៉េកាំង ការប៉ុនប៉ងមួយចំនួនអាចត្រូវបានធ្វើឡើងដើម្បីចម្លងការច្នៃប្រឌិតយោធារបស់រុស្ស៊ី។
ដោយវាយតម្លៃលើបញ្ហាខាងលើ លោក Dmitry Stefanovich អ្នកស្រាវជ្រាវនៅមជ្ឈមណ្ឌលសន្តិសុខអន្តរជាតិនៃវិទ្យាស្ថានសេដ្ឋកិច្ចពិភពលោក និងទំនាក់ទំនងអន្តរជាតិ (IMEMO) បានអត្ថាធិប្បាយថា នៅសហរដ្ឋអាមេរិក វាច្បាស់ណាស់ថាពួកគេជឿថាការយល់ដឹងនិងការជឿទុកចិត្តគ្នាទៅវិញទៅមករវាងរុស្ស៊ីនឹងចិនអាចឈានដល់កម្រិតនៃឆន្ទៈក្នុងការចែករំលែកបទពិសោធន៍។ លោក Stefanovich បានបន្ថែមថា អន្តរកម្មរវាងអង្គភាពយោធានៃប្រទេសទាំងពីរនៅតែបន្តរីកចម្រើន៕ ដោយ៖ ធីរីណា