«គ្រាប់បែកកំណត់ពេលវេលា»ជិតផ្ទុះហើយ ចិននិងរុស្សីកំពុងព្យាយាមរកវិធីដោះស្រាយជាបន្ទាន់

ចែករំលែក៖

ស្ថាប័នហិរញ្ញវត្ថុរុស្ស៊ី និងចិនកំពុងស្វែងរកការលើកកម្ពស់វិធីសាស្ត្រទូទាត់ឆ្លងព្រំដែនដែលមានស្ថិរភាពបន្ថែមទៀត ចំពេលមានការដាក់ទណ្ឌកម្មជាបន្តបន្ទាប់របស់សហរដ្ឋអាមេរិកក្នុងគោលបំណងបង្អាក់ទំនាក់ទំនងហិរញ្ញវត្ថុរវាងអ្នកជិតខាងទាំងពីរនេះ។
លោក Zhang Hanhui ឯកអគ្គរដ្ឋទូតចិនប្រចាំនៅប្រទេសរុស្ស៊ីបាននិយាយនៅក្នុងបទសម្ភាសន៍មួយជាមួយកាសែត Izvestia ថា “បច្ចុប្បន្នស្ថាប័នហិរញ្ញវត្ថុពាក់ព័ន្ធនៃប្រទេសចិន និងរុស្ស៊ីកំពុងសិក្សាពីលទ្ធភាពនៃកិច្ចសហប្រតិបត្តិការដោយប្រើប្រព័ន្ធទូទាត់ប្រាក់ Mir” ។
ប្រព័ន្ធទូទាត់ប្រាក់ Mir ដែលអភិវឌ្ឍដោយខ្លួនឯងរបស់រុស្ស៊ីត្រូវបានបង្កើតឡើងដោយធនាគារកណ្តាលនៃប្រទេសរុស្ស៊ី ជាជម្រើសជំនួសកាត Visa និង Mastercard ។
លោក Zhang បាននិយាយថា កិច្ចសហប្រតិបត្តិការហិរញ្ញវត្ថុរវាងប្រទេសចិននឹងរុស្ស៊ីគឺជា “ធាតុផ្សំដ៏សំខាន់ និងការធានាដែលអាចទុកចិត្តបាន” រវាងអាជីវកម្មនៅក្នុងប្រទេសទាំងពីរ ហើយថាអង្គការទាំងនេះបន្តកិច្ចសហប្រតិបត្តិការលើបញ្ហាការទូទាត់ពាណិជ្ជកម្ម ការគ្រប់គ្រងទ្រព្យសម្បត្តិ និងការធានារ៉ាប់រង។
លោក Zhang បាននិយាយថា “ទាក់ទងនឹងបញ្ហាការទូទាត់ដោយសារតែការដាក់ទណ្ឌកម្មពីប្រទេសទីបី ស្ថាប័នហិរញ្ញវត្ថុចិននិងរុស្ស៊ីនឹងបន្តពង្រឹងទំនាក់ទំនង” ដោយបន្ថែមថា ប្រទេសចិននឹងអនុញ្ញាតឱ្យប្រើកាបូបអេឡិចត្រូនិកបរទេសកាន់តែច្រើន រួមទាំងអ្នកទេសចររុស្ស៊ីផងដែរ។
លោក Zhang បាននិយាយថា “យើងមានទំនុកចិត្តថា ភាគីនានានឹងអាចស្វែងរកដំណោះស្រាយជាក់ស្តែងចំពោះបញ្ហានេះ” ។
ការអត្ថាធិប្បាយរបស់អ្នកការទូតចិនបានធ្វើឡើងបន្ទាប់ពីទីក្រុងវ៉ាស៊ីនតោនបានដាក់ទណ្ឌកម្មថ្មីលើទីក្រុងមូស្គូកាលពីខែមុន ដោយបង្កើនហានិភ័យនៃការដាក់ទណ្ឌកម្មបន្ទាប់បន្សំលើស្ថាប័នហិរញ្ញវត្ថុបរទេសដែលគាំទ្រដល់សង្គ្រាមរបស់រុស្ស៊ីប្រឆាំងនឹងអ៊ុយក្រែន។
ប៉ុន្តែលោកវេជ្ជបណ្ឌិត Li Mingbo ព្រឹទ្ធបុរសរងនៅវិទ្យាស្ថាន Guangzhou Greater Bay Area បាននិយាយថា ប្រព័ន្ធទូទាត់ប្រាក់ Mir ប្រហែលជាមិនផ្តល់អត្ថប្រយោជន៍ដល់ប្រទេសចិនទេ ហើយវាអាចគ្រាន់តែជាវិធានការសង្គ្រោះបន្ទាន់រយៈពេលខ្លីប៉ុណ្ណោះ។
កាលពីមុន លោក Li បានដឹកនាំក្រុមស្រាវជ្រាវមួយដើម្បីស្ទង់មតិក្រុមហ៊ុននៅក្នុងខេត្ត Guangdong, Fujian, Henan និង Shaanxi ហើយបានរកឃើញថាធនាគារចិនភាគច្រើនកាន់តែមានភាពតឹងរ៉ឹងក្នុងការត្រួតពិនិត្យការទទួលរូបិយប័ណ្ណបរទេសពីអាជីវកម្មដែលទាក់ទងនឹងប្រទេសរុស្ស៊ីដោយសារតែការពង្រីកវិសាលភាពនៃទណ្ឌកម្មបន្ទាប់បន្សំ។ ដោយការិយាល័យគ្រប់គ្រងទ្រព្យសម្បត្តិបរទេសរបស់ក្រសួងរតនាគារសហរដ្ឋអាមេរិក។
លោក Li បានបន្ថែមថា “ប្រសិនបើចិន និងរុស្ស៊ីអាចសម្រេចបាននូវកិច្ចសហប្រតិបត្តិការដោយផ្ទាល់លើប្រព័ន្ធទូទាត់ហិរញ្ញវត្ថុ ពួកគេអាចជៀសផុតពីស្ថាប័នហិរញ្ញវត្ថុរបស់សហរដ្ឋអាមេរិក និងចិនមិនចាំបាច់ព្រួយបារម្ភអំពីការរងទណ្ឌកម្មកម្រិតទីពីររបស់សហរដ្ឋអាមេរិកនោះទេ។
ទោះបីជាចិនមិនបានចូលរួមជាមួយប្រទេសលោកខាងលិចក្នុងការដាក់ទណ្ឌកម្មលើរុស្ស៊ីក៏ដោយ ក៏អ្នកនាំចេញរបស់ចិនដែលបានធ្វើពាណិជ្ជកម្មជាមួយក្រុមហ៊ុនរុស្ស៊ីបាននិយាយថាពួកគេបានជួបប្រទះការពន្យារពេលក្នុងការទូទាត់៕ ដោយ៖ ធីរីណា