សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យជាសិស្សសាលាចំនួន០២នាក់ក្នុងចំណោមបក្ខពួក០៣នាក់ ត្រូវបានកម្លាំងជំនាញនៃអធិការដ្ឋាននគរបាលខណ្ឌដង្កោ ចាប់បញ្ចូនខ្លួនទៅតុលាការនាព្រឹកថ្ងៃទី២៩ ខែកក្កដា ឆ្នាំ២០២៤ ដេីម្បីផ្ដន្ទាទោសតាមច្បាប់ ពាក់ព័ន្ធករណីហិង្សាដោយចេតនាមានស្ថានទម្ងន់ទោស(ប្រើកាំបិតបុ័ងតោកាប់បណ្តាលឱ្យជនរងគ្រោះរងរបួសធ្ងន់)កាលពីថ្ងៃទី១៩ ខែកក្កដា ឆ្នាំ២០២៤ វេលាម៉ោង១៤និង៣០នាទីនៅត្រង់ចំណុចហាងកាហ្វេយីហោ ប៊ីប៊យ ផ្លូវបេតុង ស្ថិតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។
សមត្ថកិច្ចបានឱ្យដឹងថា ជនរងគ្រោះឈ្មោះ ឡោ សុវណ្ណសូរិយ៉ា ភេទប្រុស អាយុ១៦ឆ្នាំ មុខរបរសិស្ស មានទីលំនៅ ភូមិឬស្សី២ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ (រងរបួសធ្ងន់)។ ចំណែកជនសង្ស័យដែលឃាត់ខ្លួនបានចំនួន០២នាក់ ១-ឈ្មោះ វាសនា សុខវិជ្ជា ភេទប្រុស អាយុ១៧ឆ្នាំ មុខរបរសិស្ស មានទីលំនៅផ្ទះលេខ១៩៩ ផ្លូវលេខ០៥ ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ទី២-ឈ្មោះ សំបូរ ហេរ៉ូ ភេទប្រុស អាយុ១៤ឆ្នាំ មុខរបរ សិស្ស មានទីលំនៅភូមិ៧ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញឃាត់ខ្លួននៅវេលាម៉ោង១៨និង៤០នាទី ថ្ងៃទី២៧ ខែកក្កដាឆ្នាំ២០២៤ ត្រង់ចំណុច ហាងកាហ្វេយីហោ ចរណៃ ផ្លូវលេខ០១ ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។
ក្នុងករណីនេះ សម្ភារៈបន្សល់ទុកមាន ១-ម៉ូតូម៉ាកSUZUKI NEX ពណ៌ស លាយក្រហម ពាក់ស្លាកលេខ ភ្នំពេញ ១JY-៨០០៧ ចំនួន០១គ្រឿង, ២-កាំបិតបុ័ងតោចំនួន០១ដើម, ៣-ទូរស័ព្ទដៃចំនួន០២គ្រឿង(ម៉ាកIPHONE X ពណ៌ស ចំនួន០១គ្រឿង,ម៉ាកIPHONE ១១ ពណ៌ទឹកសណ្តែក ចំនួន០១គ្រឿង) ។ ខណៈសម្ភារ:បាត់បង់: គ្មាន ។
គួររំលឹក ថា កាលពីថ្ងៃទី១៩ ខែកក្កដា ឆ្នាំ២០២៤ វេលាម៉ោង១៣និង១០នាទី ជនរងគ្រោះឈ្មោះ ឡោ សុវណ្ណសូរិយ៉ា ភេទប្រុស អាយុ១៦ឆ្នាំ បានជិះម៉ូតូ០១គ្រឿង ម៉ាកHONDA DREAM C១២៥ ពណ៌ខ្មៅ ពាក់ស្លាកលេខ ភ្នំពេញ១CM-៥៣៧០ ចេញពីផ្ទះស្ថិតនៅភូមិឬស្សី២ សង្កាត់ស្ទឹងមានជ័យទី២ ខណ្ឌមានជ័យ មកហាងកាហ្វេយីហោ ប៊ីប៊យ ផ្លូវបេតុង ស្ថិតនៅភូមិសំបួរ សង្កាត់ដង្កោ ខណ្ឌដង្កោ ។ ពេលជនរងគ្រោះមកដល់ហាងកាហ្វេយីហោ ប៊ីប៊យ ខាងលើ ជនរងគ្រោះក៏បានចូលទៅអង្គុយផឹកភេសជ្ជៈនៅខាងក្នុងហាង។
លុះដល់វេលាម៉ោង១៤និង៣០នាទី ថ្ងៃខែឆ្នាំដដែល ស្រាប់តែមានជនសង្ស័យចំនួន០៣នាក់ ជិះម៉ូតូ០១គ្រឿងម៉ាកSUZUKI NEX ពណ៌ស លាយក្រហម មិនចាំសេ៊រី មិនចាំស្លាកលេខ បានធ្វើសកម្មភាពយកកាំបិតបុ័ងតោចូលមកកាប់ជនរងគ្រោះត្រូវចំកែងដៃខាងស្ដាំ និងស្មាខាងស្ដាំ (រងរបួសធ្ងន់) រួចជនសង្ស័យក៏បានជិះម៉ូតូគេចខ្លួនបាត់ទៅ។ បន្ទាប់ជនរងគ្រោះក៏បានមកមន្ទីរពេទ្យបង្អែកដង្កោ ដើម្បីលាងរបួស និងដេរចំនួន២០ថ្នេរ ហើយឈ្មោះ ឡោ ថេរ៉ា ភេទប្រុស អាយុ១៩ឆ្នាំ ត្រូវជាបងបង្កើតរបស់ជនរងគ្រោះក៏បាននាំជនរងគ្រោះមកប៉ុស្តិ៍នគរបាលរដ្ឋបាលដង្កោ រាយការណ៍ប្រាប់សមត្ថកិច្ច និងដាក់ពាក្យបណ្តឹងដើម្បីឱ្យសមត្ថកិច្ចជួយស្រាវជ្រាវរកជនសង្ស័យយកមកធ្វើការសាកសួរចាត់ការតាមនីតិវិធីច្បាប់ ។
រហូតដល់ថ្ងៃទី២៧ ខែកក្កដា ឆ្នាំ២០២៤ វេលាម៉ោង១៨និង៤០នាទី សមត្ថកិច្ចជំនាញក៏បានធ្វើការស្រាវជ្រាវឃាត់ខ្លួនជនសង្ស័យបានចំនួន០២នាក់ ទី០១-ឈ្មោះ វាសនា សុខវិជ្ជា ភេទប្រុស អាយុ១៧ឆ្នាំ ទី០២-ឈ្មោះ សំបូរ ហេរ៉ូ ភេទប្រុសអាយុ១៤ឆ្នាំ រួមនឹងវត្ថុតាង ត្រង់ចំណុចហាងកាហ្វេយីហោ ចរណៃ ផ្លូវលេខ០១ ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ យកមកប៉ុស្តិ៍នគរបាលរដ្ឋបាលដង្កោ ធ្វើការសាកសួរតាមនីតិវិធីច្បាប់។
ក្រោយពីធ្វើការសាកសួរជនសង្ស័យបានឆ្លើយសារភាពប្រាប់សមត្ថកិច្ចយើងថា រូបគេ(ជនសង្ស័យ)ពិតជាបានធ្វើសកម្មភាពយកកាំបិតបុ័ងតោកាប់ទៅលើជនរងគ្រោះបណ្ដាលឲ្យរងរបួសធ្ងន់ប្រាកដមែន៕
ដោយ ៖ ភារ៉ា ដង្កោ
