អ៊ុយក្រែនបានអញ្ជើញលោក វ៉ាង យី ទៅទស្សនកិច្ចនៅទីក្រុងគៀវ

ចែករំលែក៖

ក្រសួងការបរទេសនៃប្រទេសអ៊ុយក្រែនបានអញ្ជើញរដ្ឋមន្ត្រីការបរទេសចិនលោក Wang Yi មកបំពេញទស្សនកិច្ចនៅទីក្រុងគៀវ ដើម្បីជំរុញកិច្ចប្រជុំកម្រិតខ្ពស់រវាងប្រធានាធិបតី Volodymyr Zelensky នឹងប្រធានាធិបតីចិន Xi Jinping ។
យោងតាមទីភ្នាក់ងារសារព័ត៌មាន Reuters នៅថ្ងៃទី 30 ខែកក្កដា អ្នកនាំពាក្យក្រសួងការបរទេសអ៊ុយក្រែន លោក Heorhii Tykhyi បាននិយាយថា ក្រុងគៀវបានអញ្ជើញរដ្ឋមន្ត្រីការបរទេសចិន លោក Wang Yi ទៅបំពេញទស្សនកិច្ចនៅអ៊ុយក្រែន ។ “បន្ថែមពីលើការអញ្ជើញលោក Wang Yi មកបំពេញទស្សនកិច្ចនៅទីក្រុងគៀវ យើងក៏ចង់ជំរុញកិច្ចប្រជុំកម្រិតខ្ពស់រវាងប្រធានាធិបតី Volodymyr Zelensky នឹងប្រធានាធិបតីចិន Xi Jinping ដែលអាចប្រព្រឹត្តទៅនាពេលអនាគត។ ប៉ុន្តែវានៅតែលឿនពេកក្នុងការនិយាយឱ្យច្បាស់ថា តើការប្រជុំអាចនឹងប្រព្រឹត្តទៅនៅពេលណា»។
លោក Tykhyi ក៏បានសង្កត់ធ្ងន់ថា អ៊ុយក្រែនត្រៀមខ្លួនជាស្រេចស្វាគមន៍លោក Wang Yi ទៅកាន់ទីក្រុង Kiev ដើម្បីធ្វើការចរចាទ្វេភាគីយ៉ាងទូលំទូលាយក្នុងវិស័យការទូតរវាងប្រទេសទាំងពីរ។ “លោក Wang Yi ក៏អាចមើលឃើញដោយភ្នែករបស់គាត់ផងដែរនូវអ្វីដែលរុស្ស៊ីបានបង្កឡើងដល់អ៊ុយក្រែននៅក្នុងជម្លោះដែលបានអូសបន្លាយជាង 3 ឆ្នាំ” ។
យោងតាមទីភ្នាក់ងារព័ត៌មាន Reuters ការអញ្ជើញរបស់អ៊ុយក្រែនទៅកាន់លោក Wang Yi ឱ្យទៅបំពេញទស្សនកិច្ចនៅទីក្រុងគៀវ បានធ្វើឡើងក្នុងបរិបទដែលទំនាក់ទំនងទីក្រុងប៉េកាំង-គៀវ កាន់តែមានភាពស្វាហាប់នាពេលថ្មីៗនេះ។ កាលពីសប្តាហ៍មុន រដ្ឋមន្ត្រីការបរទេសអ៊ុយក្រែន លោក Dmytro Kuleba បានទៅបំពេញទស្សនកិច្ចនៅទីក្រុងប៉េកាំង។
Reuters បានដកស្រង់ព័ត៌មានពីក្រសួងការបរទេសអ៊ុយក្រែនថា នៅទីក្រុងប៉េកាំង លោក Kuleba បានបញ្ជាក់ថា ក្រុងគៀវ តែងតែត្រៀមខ្លួនរួចជាស្រេចក្នុងការចរចាបញ្ចប់ជម្លោះជាមួយរុស្ស៊ី ប៉ុន្តែលុះត្រាតែបូរណភាពទឹកដី និងអធិបតេយ្យភាពរបស់អ៊ុយក្រែនត្រូវបានគោរព និងធានា។
ចិនបានបញ្ជាក់ជំហរអព្យាក្រឹតរបស់ខ្លួនជាយូរមកហើយ ហើយមានឆន្ទៈក្នុងការធ្វើជាអ្នកសម្រុះសម្រួលក្នុងជម្លោះរុស្ស៊ី និងអ៊ុយក្រែន៕ ដោយ៖ ធីរីណា