បើទោះជាមានការហាមប្រាមក៏ដោយ បារាំងនៅតែបង្កើនការនាំចូលឧស្ម័នរាវពីរុស្ស៊ី

ចែករំលែក៖

យោងតាមរបាយការណ៍ដែលចេញផ្សាយដោយវិទ្យាស្ថានសេដ្ឋកិច្ចថាមពល និងការវិភាគហិរញ្ញវត្ថុ (IEEEFA) បានឱ្យដឹងថា បរិមាណឧស្ម័នធម្មជាតិរាវ (LNG) របស់បារាំងដែលនាំចូលពីប្រទេសរុស្ស៊ីបានកើនឡើងទ្វេដងនៅក្នុងឆមាសទីមួយនៃឆ្នាំ 2024 ។ វាបានកើតឡើងនៅពេលដែលសហភាពអឺរ៉ុបបានប្តេជ្ញាចិត្តបញ្ឈប់ការប្រើប្រាស់ប្រេងឥន្ធនៈពី ប្រទេសរុស្ស៊ីនៅឆ្នាំ 2027 ។
យោងតាមការវិភាគរបស់ IEEFA ការដឹកជញ្ជូន LNG របស់រុស្ស៊ីទៅកាន់សហភាពអឺរ៉ុបទាំងមូលបានកើនឡើង 7% ក្នុងរយៈពេលប្រាំមួយខែដំបូងនៃឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន។
ក្នុងនោះក្រុមហ៊ុនបារាំងបាននាំចូល LNG ជិត ៤,៤ ពាន់លានម៉ែត្រគុប បើធៀបនឹងជាង ២ ពាន់លានម៉ែត្រគុបក្នុងរយៈពេលដូចគ្នាកាលពីឆ្នាំមុន។ អេស្ប៉ាញ និងបែលហ្សិក គឺជាអ្នកទិញធំបំផុតបន្ទាប់ ប៉ុន្តែទិន្នន័យបានធ្លាក់ចុះ 1% និង 16% ។
នៅក្នុងខែមិថុនា ឆ្នាំ 2024 សហភាពអឺរ៉ុបបានហាមឃាត់សកម្មភាពមួយចំនួនទាក់ទងនឹង LNG ដែលមានប្រភពមកពីប្រទេសរុស្ស៊ី ដូចជាការផ្ទុកឡើងវិញ ការផ្ទេរពីកប៉ាល់ទៅកប៉ាល់ និងការផ្ទេរពីកប៉ាល់ទៅច្រាំងសម្រាប់គោលបំណងនៃការនាំចេញឡើងវិញទៅកាន់ប្រទេសទីបី។
ការនាំចូលឧស្ម័នតាមសមុទ្រពីរុស្ស៊ីទៅសហភាពអឺរ៉ុបនៅតែត្រូវបានអនុវត្តនៅតាមដេប៉ូ LNG ដែលភ្ជាប់ទៅនឹងបណ្តាញកាន់តែទូលំទូលាយ។ បារាំង និងអេស្ប៉ាញមានចំណុចប្រមូលផ្តុំច្រើនជាងគេនៅអឺរ៉ុប។
ក្រុមហ៊ុនថាមពលដ៏ធំរបស់បារាំង TotalEnergies ទទួលខុសត្រូវលើការនាំចូលភាគច្រើន។ តំណាងក្រុមហ៊ុនបាននិយាយថា ពួកគេត្រូវបានចងភ្ជាប់ដោយកិច្ចសន្យាជាមួយរុស្ស៊ីដែលបានចុះហត្ថលេខាមុនពេលជម្លោះនៅអ៊ុយក្រែនផ្ទុះឡើង។ ពួកគេនឹងគោរពកិច្ចព្រមព្រៀងនេះ ដរាបណាអឺរ៉ុបចាត់ទុកឧស្ម័នរុស្ស៊ីចាំបាច់សម្រាប់សន្តិសុខថាមពល៕ ដោយ៖ ធីរីណា