លោក ឈាង វុន ៖ ហេតុអ្វីនៅឆ្នាំ២០១៥គ្មានការតវ៉ាអ្វីសោះក្នុងការងារ CLV ហើយទើបតែមកភ្ញាក់ផ្អើលនៅពេលនេះទៅវិញ?

ភ្នំពេញ ៖ លោក ឈាង វុន ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា បានលើកឡើងថា ៖ កាលពីឆ្នាំ២០១៥ លោកបានដឹកនាំគណ:កម្មការសភានៃព្រះរាជាណាចក្រកម្ពុជា នៃគណ:កម្មការអន្តរសភាកម្ពុជា ឡាវ វៀតណាម ទៅចូលរួមកិច្ចប្រជុំ CLV នៅខេត្តចំប៉ាសាក់ ប្រទេសឡាវ។

លោក ឈាង វុន បានគូសបញ្ជាក់បន្ថែមថា ៖ នៅក្នុងគណ:ប្រតិភូនាពេលនោះ ក៏មានសមាជិក៣រូបមកពីគណបក្សសង្គ្រោះជាតិរួមមាន៖ លោក កែវ ភិរម្យ លោក ញ៉យ ចំរើន និងលោក គី វាណ្ណដារ៉ា សម្រាប់រដ្ឋសភា អាណត្តិទី៥ ផងដែរ ពោលគឺមិនត្រឹមតែគណបក្ស សម រង្ស៊ី ទេ ដែលបានចូលរួមការងារ CLV សូម្បីតែគណបក្សសង្គ្រោះជាតិពេលនោះ ក៏បានចូលរួមដែរ។

លោក ឈាង វុន ក៏បានលើកឡើងជាសំណួរថា ៖ ហេតុម្តេចពេលនោះបានជាគ្មានការតវ៉ាអ្វីសោះនៅពេលនោះ ហើយទើបតែមកភ្ញាក់ផ្អើលនៅពេលនេះទៅវិញ។ មេឃដូចមិនស្រឡះសោះ ក្នុងរឿងនេះ ឈប់បោកយុវជន ឈប់បោកប្រជាពលរដ្ឋទៀតទៅ៕

ដោយ ៖ សិលា