សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ផលិតផលម្សៅរុក្ខជាតិ សូន្យម្សៅរុក្ខជាតិម៉ាក”វ៉ាយ អេស ខេ អិល” (Y.S.K.L) រំលោភកម្មសិទ្ធិបញ្ញា និងឱសថគ្មានអាជ្ញាប័ណ្ណ និងគ្មានការអនុញ្ញាតពីក្រសួងសុខាភិបាលចំនួន ២៩៤កេស ត្រូវបានកម្លាំងនគរបាលជំនាញប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលរាជធានីភ្នំពេញ យកមកដុតកម្ទេចចោល ក្រោយធ្វើការបង្រ្កាបបាន។
ជាក់ស្ដែងដោយអនុវត្តតាមលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅព្រឹកថ្ងៃទី១៣ ខែកញ្ញា ឆ្នាំ២០២៤ លោកឧត្តមសេនីយ៍ទោ ពិត បញ្ញា ស្នងការរង ទទួលផែនការងារនគរបាលប្រឆាំងបទល្មើសសេដ្ឋកិច្ច និងលោកឧត្តមសេនីយ៍ត្រី ម៉ៅ រង្សី ស្នងការរងទទួល ដឹកនាំការងារការិយាល័យនគរបាលប្រឆាំងបទល្មើសសេដ្ឋកិច្ច ចាត់ឱ្យលោកវរសេនីយ៍ឯក យឹម សុជាតិ នាយការិយាល័យនគរបាលប្រឆាំងបទល្មើសសេដ្ឋកិច្ច ដឹកនាំកម្លាំងការិយាល័យនគរបាលប្រឆាំងបទល្មើសសេដ្ឋកិច្ច សហការជាមួយពីមន្រ្តីសាខា កបប រាជធានីភ្នំពេញ យកឱសថគ្មានអាជ្ញាប័ណ្ណ និងគ្មានការអនុញ្ញាតពីក្រសួងសុខាភិបាល ចំនួន១៣មុខ ស្មើនឹង ២៩៤កេស និង ផលិតផលម្សៅរុក្ខជាតិ សូន្យម្សៅរុក្ខជាតិ ម៉ាក វ៉ាយ អេស ខេ អិល (Y.S.K.L) ដោយគ្មានការអនុញ្ញាត «រំលោភកម្មសិទ្ធិបញ្ញា » ចំនួន១០០ (មួយរយ) កំប៉ុង យកទៅបំផ្លាញចោលនៅទីលានចាក់សម្រាម ឋិតក្នុងខណ្ឌដង្កោ ដែលកម្លាំងជំនាញសហការជាមួយសមត្ថកិច្ចចម្រុះធ្វើការបង្ក្រាបកន្លងមក។
គួរជម្រាបថា ក្រសួងសុខាភិបាលកម្ពុជា កាលពីពេលថ្មីៗនេះ ក៏បានអំពាវនាវឱ្យសាធារណជនបញ្ឈប់ការទិញឱសថ និងផលិតផលបំប៉នសុខភាព ឬអាហារបំប៉នសុខភាព គ្រប់ប្រភេទតាមបណ្តាញទំនាក់ទំនងសង្គម ដូចជា៖ Facebook, TikTok, Telegram និងYoutube ព្រោះឱសថ និងផលិតផលមួយចំនួនគឺពុំអាចធានាបាននូវគុណភាព និងសុវត្ថិភាពឡើយ៕
ដោយ៖ តារា
