សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបេីកឡំប្រឺតាយ៉ាងលឿននិងមិនប្រយ័ត្នបានជ្រុលទៅបុករបាំងថ្មពុះចែកទ្រូងផ្លូវបណ្តាលឲ្យឡំប្រឺតារងការខូចខាតយ៉ាងដំណំ បង្កការភ្ញាក់ផ្អើលកាលពីវេលាម៉ោង៧នឹង៤០នាទីយប់ថ្ងៃទី១៧ខែកញ្ញាឆ្នាំ២០២៤នៅតាមបណ្តោយផ្លូវសហព័ន្ធរុស្ស៊ីគល់ស្ពានអាកាស៧មករា ដែលស្ថិតនៅក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកេីតហេតុគេឃើញបុរសម្នាក់បានបេីកឡំប្រឺតាមួយគ្រឿង ពណ៌ក្រហម ពាក់ផ្លាកលេខភ្នំពេញ1HC-3853 ធ្វើដំណើរតាមបណ្ដោយផ្លូវសហព័ន្ធរុស្ស៊ី ក្នុងទិសដៅពីកេីតទៅលិច ដោយល្បឿនយ៉ាងលឿន លុះបេីកមកដល់ចំណុចកេីតហេតុជិតគល់ស្ពានអាកាស៧មករា ដោយមានផ្លូវបំបែកជា២ មួយឡេីងលេីស្ពាននិងមួយទៀតបេីកខាងក្រោមស្ពាន ។ ភ្លាមនោះជនរងគ្រោះបេីកមិនប្រយ័ត្នក៏ជ្រុលទៅបុករបាំងថ្មពុះចែកទ្រូងពេញទំហឹងបណ្តាលឲ្យរងការខូចខាតឡំប្រឺតាយ៉ាងដំណំ ចំណែកអ្នកបេីកបររងរបួសស្រាល។
ក្រោយពេលកេីតហេតុ សមត្ថកិច្ចនគរបាលប៉ុស្តិ៍ទឹកល្អក់ទី១បានចុះដល់កន្លែងកេីតហេតុ និងបានទាក់ទងទៅក្រុមគ្រួសារសាច់ញាតិឲ្យមកទទួលជនរងគ្រោះ និងបានសណ្ដោងឡំប្រឺតា យកទៅជួសជុលដោយខ្លួនឯង ៕
ដោយ ៖ ភារ៉ា ដង្កោ
