សារព័ត៌មាន នគរវត្ត តែងតែនាំមុខគេជានិច្ច
សារព័ត៌មាន AFP នាថ្ងៃព្រហស្បតិ៍ ទី១៤ ខែវិច្ឆិកា ឆ្នាំ២០២៤បានផ្សាយថាប្រធានាធិបតីអាមេរិក លោក ចូ បៃដិន កាលពីថ្ងៃពុធសប្តាហ៍នេះ បានទទួលស្វាគមន៍ប្រធានាធិបតីជាប់ឆ្នោត លោក ដូណាល់ ត្រាំ នៅឯសេតវិមាន ជាជំនួបប្រពៃណីមួយ ដែលមិនបានកើតឡើងនោះឡើយ កាលពីពេលដែលលោក ត្រាំ ចាញ់លោក បៃដិន ក្នុងការបោះឆ្នោតប្រធានាធិបតីឆ្នាំ២០២០។
ក្នុងជំនួបខាងលើ លោក បៃដិន អាយុ៨១ឆ្នាំ និង លោក ត្រាំ អាយុ៧៨ឆ្នាំ បានចាប់ដៃរាក់ទាក់គ្នា ហើយអ្នកទាំងពីរ បានសន្យាថា ដំណើរការផ្ទេរអំណាច នឹងប្រព្រឹត្តទៅដោយរលូនបំផុត ពោលគឺផ្ទុយគ្នាជាមួយកាលពីពេល លោក ត្រាំ បានបដិសេធទទួលស្គាល់បរាជ័យរបស់ខ្លួន កាលពីឆ្នាំ២០២០។ ក្រោយចាញ់ការបោះឆ្នោតនាពេលនោះ លោក ត្រាំ ពុំបានអញ្ជើញលោក បៃដិន ទៅជួបគ្នានៅសេតវិមានឡើយ។ ការមិនទទួលស្គាល់របស់លោក ត្រាំ ថែមទាំងបង្កឱ្យក្រុមអ្នកគាំទ្ររបស់លោក នាំគ្នាសម្រុកចូលវាយលុកវិមានសភាអាមេរិកទៀតផង នៅប៉ុន្មានសប្តាហ៍មុនពេល លោក បៃដិន ត្រូវស្បថចូលកាន់តំណែង។លោក បៃដិន ដែលកាន់អំណាចបានមួយអាណត្តិ សម្រេចចិត្តមិនបន្តឈរឈ្មោះសម្រាប់អាណត្តិទី២ ប៉ុន្តែបានមើលឃើញអនុប្រធានាធិបតីរបស់លោក គឺលោកស្រី កាម៉ាឡា ហារីស ចាញ់លោក ត្រាំ ក្នុងការបោះឆ្នោតប្រធានាធិបតីកាលពីសប្តាហ៍មុន។ លោក ដូណាល់ ត្រាំ នឹងត្រឡប់មកកាន់អំណាចនៅសេតវិមាន សាជាថ្មី នាថ្ងៃទី២០ ខែមករា ឆ្នាំ២០២៥។ កាលពីអំឡុងពិធីស្បថចូលកាន់តំណែងរបស់លោក បៃដិន នៅថ្ងៃទី២០ ខែមករា ឆ្នាំ២០២១ លោក ត្រាំ ក៏មិនបាននៅចូលរួមដែរ៕
ដោយ៖ ធីរីណា(រូបថត៖ REUTERS)
