សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តដឹកអីវ៉ាន់បេីកលឿនជ្រុលទៅបុកម៉ូតូកង់បីកែច្នៃនិងកិនអូសជាច្រើនម៉ែត្របណ្តាលឱ្យជនរងគ្រោះជាអ្នកបើកម៉ូតូកង់បីដាច់ដៃម្ខាងរបួសធ្ងន់ត្រូវបានរថយន្តសង្គ្រោះរបស់មន្ទីរពេទ្យកម្ពុជា-ចិនព្រះកុសុមៈដឹកយកទៅសង្រ្គោះបន្ទាន់ភ្លាមៗ ។
ហេតុការណ៍នេះបង្កឲ្យមានការភ្ញាក់ផ្អើលឡើងកាលពីម៉ោង៥នឹង១៥នាទីទៀបភ្លឺថ្ងៃទី៥ ខែធ្នូ ឆ្នាំ២០២៤ នៅតាមបណ្តោយផ្លូវ២៧១ ទល់មុខសាលាវិទ្យាល័យជាសុីមសាមគ្គីដែលស្ថិតនៅក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ។
ប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកេីតហេតុគេឃើញជនរងគ្រោះវ័យចំណាស់ម្នាក់បើកម៉ូតូកង់បីកែច្នៃមកទិញបន្លែនឹងត្រីនៅជិតវិទ្យាល័យជាសុីមសាមគ្គី ហេីយក៏ត្រឡប់ទៅវិញ ដោយជិះតាមបណ្ដោយផ្លូវលេខ២៧១ក្នុងទិសដៅពីលិចទៅកេីត ខណៈមកដល់កន្លែងកើតហេតុស្រាប់តែមានរថយន្ដម៉ាកហុីយ៉ាន់ដាយ ពណ៌សពាក់ស្លាកលេខភ្នំពេញ3E-8281បេីកតាមបណ្ដោយផ្លូវ២៧១ក្នុងទិសដៅពីលិចទៅកេីតស្របជាមួយជនរងគ្រោះ តែរថយន្តបេីកក្នុងល្បឿនយ៉ាងលឿនជាន់ហ្រ្វ័ងមិនជាប់ជ្រុលទៅបុកម៉ូតូកង់បីកែច្នៃរបស់អ៊ំប្រុសម្នាក់អូសជាច្រើនម៉ែត្របណ្តាលអោយជនរងគ្រោះដាច់ដៃម្ខាងរងរបួសធ្ងន់ ។
ក្រោយកេីតហេតុ អ្នកបេីកបររថយន្តបានចុះពីលេីរថយន្ត តែឃេីញជនរងគ្រោះរងរបួសធ្ងន់ពេកបានរត់ចេញពីកន្លែងកេីតហេតុ តែត្រូវបានបងប្អូនប្រជាពលនាំគ្នាដេញឃាត់ប្រគល់អោយសមត្ថកិច្ចនគរបាលភ្លាមៗ ចំណែកជនរងគ្រោះត្រូវបានរថយន្តសង្គ្រោះបន្ទាន់របស់មន្ទីរពេទ្យ កម្ពុជា-ចិនព្រះកុសុមះដឹកយកទៅសង្គ្រោះបន្ទាន់ភ្លាម ។
បន្ទាប់ពីកេីតហេតុ សមត្ថកិច្ចនគរបាលខណ្ឌមានជ័យបានទាក់ទងទៅកម្លាំងសមត្ថកិច្ចនគរបាលចរាចរណ៍ផ្លូវគោករាជធានីភ្នំពេញដេីម្បីធ្វើការវាស់វែងយករថយន្តព្រមទាំងអ្នកបេីកបរទៅផ្នែកជំនាញដេីម្បីចាត់ការបន្តតាមនីតិវិធី៕
ដោយ៖ ជ្រោយពេជ្រ
