សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ លោក ស៊ូ ម៉ុល ប្រធានគណៈបញ្ជាការឯកភាពរដ្ឋបាលស្រុក និងជា អភិបាល ស្រុករមាសហែក បានជំរុញក្នុងការផ្ដល់សេវាសាធារណៈនិងការងារអត្រានុកូលដ្ឋានជូនដល់ បងប្អូនប្រជាពលរដ្ឋអោយបានឆាប់រហ័ស ត្រឹមត្រូវនិងមិនត្រូវយកកម្រៃសេវាខុសច្បាប់កំណត់ឡើយ។
ការជំរុញបែបនេះធ្វើឡើងនាព្រឹកថ្ងៃទី១២ ខែធ្នូ ឆ្នាំ២០២៤ ក្នុងកិច្ចប្រជុំបូកសរុប លទ្ធផលការងារប្រចាំខែធ្នូឆ្នាំ២០២៤ និងលើកទិសដៅ បន្តខែមករាឆ្នាំ២០២៥ របស់រដ្ឋបាលស្រុក នាសាលប្រជុំសាលាស្រុករមាសហែក។
កិច្ចប្រជុំនេះមានការអញ្ជើញចូលរួមពីលោក លោកស្រី អភិបាលរងស្រុក លោក នាយក នាយករងរដ្ឋបាលសាលាស្រុក លោកអធិការរងនគរបាលស្រុក លោកមេបញ្ជាការរងកងរាជអាវុធហត្ថស្រុក លោកមេបញ្ជាការរងតំបន់ប្រតិបត្តិការសឹករងស្រុក លោកមេប៉ុស្តិ៍ នគរបាលការពារព្រំដែនច្រកដូង លោក លោកស្រី ប្រធាន អនុប្រធាន ការិយាល័យចំណុះអោយរដ្ឋបាលស្រុក មន្ត្រី ពន្ធដារស្រុក និងមន្ត្រីពាក់ព័ន្ធមួយចំនួនទៀត ។
លោក អភិបាលស្រុក បន្តថា បានថ្លែងនូវការកោតសរសើរវាយតំលៃខ្ពស់ និងអរគុណចំពោះកងកម្លាំងប្រដាប់អាវុធទាំងបី អាជ្ញាធរពាក់ព័ន្ធទាំងអស់ដែលបានខិតខំការពារសន្តិសុខសណ្តាប់ធ្នាប់ល្អជូនបងប្អូនប្រជាពលរដ្ឋ ក្នុងឃុំចំនួន១៦ ទូទាំងស្រុករមាសហែក។
លោក អភិបាលស្រុក ក៏បានក្រើនរំលឹកដល់អាជ្ញាធរនិង កងកម្លាំងគ្រប់ប្រភេទត្រូវអនុវត្តការងារភូមិ ឃុំ សង្កាត់ មានសុវត្ថិភាព និងបន្តពង្រឹងការចុះបង្រ្កាបបទល្មើសផ្សេងៗ ក្នុងមូលដ្ឋានរបស់ខ្លួនពិសេសត្រូវ អនុវត្តច្បាប់ចរាចរផ្លូវគោកឱ្យបានម៉ឺងម៉ាត់ ដើម្បីធានាសន្តិសុខសណ្ដាប់ធ្នាប់ និងសុវត្ថិភាពជូនប្រជាពលរដ្ឋ។
លោក ស៊ូ ម៉ុល បានផ្តាំផ្ញើដល់អាជ្ញាធរពាក់ព័ន្ធត្រូវបន្តពង្រឹងការអនុវត្តការបង្ការទប់ស្កាត់ការជួញដូរ និងប្រើប្រាស់គ្រឿងញៀនឲ្យមាន ប្រសិទ្ធភាព ក្នុងនោះ ចំពោះប្រធានការិយាល័យអប់រំ ស្រុក ត្រូវមានវិធានការអប់រំផ្សព្វផ្សាយនៅតាមសាលារៀន និងសិស្សានុសិស្ស អោយយល់ច្បាស់ពីបញ្ហាគ្រឿងញៀន ព្រោះថាគ្រឿងញៀនគឺជះឥទ្ធិពលអាក្រក់ដល់មូលដ្ឋាន សហគមន៍ និងសង្គមជាតិយើងទាំងមូល។
ចំពោះ ប្រធានការិយាល័យ ភូមិបាលស្រុក ត្រូវពន្លឿនក្នុងការងារចុះវាស់វែងដីធ្លីជូនដល់បងប្អូនប្រជាពលរដ្ឋអោយបានឆាប់រហ័ស ពិសេសការចុះបញ្ជីដីរបស់រដ្ឋអោយមានប្រសិទ្ធភាព ពិសេសបន្តការផ្តល់សេវាសាធារណៈជូនប្រជាពលរដ្ឋបានទាន់ពេលវេលា និងឆាប់រហ័សផងដែរ។
ចំពោះ ការិយាល័យកសិកម្ម ត្រូវបន្តចុះពិនិត្យ វាយតម្លៃការងារប្រមូលផលស្រូវប្រាំងនិងការងារបង្កបង្កើនផលស្រូវរដូវវស្សា ចុះផ្សព្វផ្សាយ និងបំផុសដល់ប្រជាពលរដ្ឋយកចិត្តទុកដាក់ធ្វើការដាំដុះដំណាំរួមផ្សំ និង ការចញ្ចឹមសត្វទៅតាមលទ្ធភាពដែលអាចធ្វើទៅបានចុះតាមដានពីសុខភាពជំងឺសត្វ ចាក់ថ្នាំការពារ និងបាលជំងឺឱ្យបានទន់ពេលវេលា។
ពិសេសចុះផ្សព្វផ្សាយ អនុក្រឹត្យលេខ ១១៣ អ.ន.ក្រ ស្តីពីការគ្រប់គ្រង សំរាមសំណល់រឹង នៅទី ប្រជុំជន (ផ្សារ) និងផ្លូវសារធារណៈការិយាល័យ សេដ្ឋកិច្ច និងអភិវឌ្ឍសហគមន៍ផ្សព្វផ្សាយការងារទឹកស្អាត និងការសម្អាតអនាម័យជនបទ ផ្សព្វផ្សាយដល់អាជីវករធ្វើអាជីវកម្មគ្រប់ប្រភេទមកដាក់ពាក្យស្នើសុំអនុញ្ញាតធ្វើអាជីវកម្មពិនិត្យផ្លូវជនបទ ពិនិត្យដងអង់តែនទូរស័ព្ទ ពង្រឹងសមត្ថភាពគណៈកម្មាធិការអភិវឌ្ឍន៍ភូមិ (គ.អ.ក )៕
ដោយ៖ សុថាន
