សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អ្នកនាំពាក្យសាលាដំបូងរាជធានីភ្នំពេញ មានកិត្តិយសសូមជម្រាបជូនដល់សាធារណជនជ្រាបថា នៅថ្ងៃទី១៣ ខែធ្នូ ឆ្នាំ២០២៤នេះ សាលាដំបូងរាជធានីភ្នំពេញ បានចាត់ការលើសំណុំរឿងព្រហ្មទណ្ឌលេខ ៧៨៩៤ ចុះថ្ងៃទី០៩ ខែធ្នូ ឆ្នាំ២០២៤ ទាក់ទិននឹងករណីគ្រឿងញៀន រួមមានសារធាតុមិនច្បាស់ចំនួន ២៤ប្រភេទ ទម្ងន់ ៨ ១៤៦.៦១ក្រាម ដែលមានជនត្រូវចោទមានខ្លួនចំនួន ១១នាក់ គឺ ១.ឈ្មោះ ហ័ង ហានអ្វី (HUANG HAN YU) ភេទប្រុស អាយុ ២០ឆ្នាំ ២.ឈ្មោះ ឡៃ ផុង (LE PENG) ភេទប្រុស អាយុ ២៩ឆ្នាំ ៣.ឈ្មោះ ចាង យ៉ាទាំង (ZHANG YA KANG) ភេទប្រុស អាយុ ៣៣ឆ្នាំ ៤.ឈ្មោះ លី មីងគ័ង (LI MING GUANG) ភេទប្រុស អាយុ ៣៨ឆ្នាំ ៥.ឈ្មោះ អ៊ូ ម៉ឹង (WU MENG) ភេទប្រុស អាយុ ៣០ឆ្នាំ ៦.ឈ្មោះ អ៊ុំ អ៊ីឡុង (YU YU LONG) ភេទប្រុស អាយុ ៣៧ឆ្នាំ ត្រូវបានចោទប្រកាន់ពីបទ ចាត់ចែងឱ្យប្រើប្រាស់ដោយខុសច្បាប់នូវសារធាតុញៀន ៧.ឈ្មោះ យ៉ាង ហ្វូយៀក (YANG FU YUE) ភេទប្រុស អាយុ ៣១ឆ្នាំ និងជនត្រូវចោទចំនួន ៥នាក់ទៀត រួមទាំងបក្ខពួក កំពុងគេចខ្លួន ត្រូវបានចោទប្រកាន់ពីបទ ជួញដូរ, រក្សាទុក និងសម្រួលឱ្យប្រើប្រាស់ដោយខុសច្បាប់នូវសារធាតុ ញៀន, កាន់កាប់អាវុធដោយគ្មានការអនុញ្ញាត និងសម្អាតប្រាក់ ប្រព្រឹត្តនៅចំណុចភូមិព្រែករាំង និងភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ កាលពីថ្ងៃទី០៩ ខែកុម្ភៈ ឆ្នាំ២០២៤ រហូតដល់ថ្ងៃទី០៤ ខែធ្នូ ឆ្នាំ២០២៤ បទល្មើសព្រហ្មទណ្ឌដែលមានចែង និងផ្តន្ទាទោសតាមមាត្រា ៤០ មាត្រា ៤២ មាត្រា ៤៤ នៃ ច្បាប់ស្តីពីការត្រួតពិនិត្យគ្រឿងញៀន មាត្រា ២០ នៃច្បាប់ស្តីពីការគ្រប់គ្រងអាវុធគ្រឿងផ្ទុះ និងគ្រាប់រំសេវ និង មាត្រា ៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។
បន្ទាប់ពីបានសួរចម្លើយជនត្រូវចោទ និងពិនិត្យភស្តុតាង ចៅក្រមស៊ើបសួរសម្រេចឃុំខ្លួនបណ្តោះអាសន្ន លើជនត្រូវចោទទាំង ៧នាក់ ដូចបានបញ្ជាក់ខាងលើ ដើម្បីបន្តការស៊ើបសួរតាមនីតិវិធីច្បាប់។
អ្នកនាំពាក្យសាលាដំបូងរាជធានីភ្នំពេញ សូមបញ្ជាក់ថា ចៅក្រមស៊ើបសួរសម្រេចដាក់ឱ្យស្ថិតក្រោមការ ត្រួតពិនិត្យតាមផ្លូវតុលាការ លើជនត្រូវចោទចំនួន ៤នាក់ គឺ ១.ឈ្មោះ លី ពីនអាយ (LIN PIN AI) ភេទស្រី អាយុ ២៥ឆ្នាំ ២.ឈ្មោះ ស៊ូ ជីធិ (XU ZI LI) ភេទស្រី អាយុ ២៤ឆ្នាំ ៣.ឈ្មោះ ឡាន ស៊ីនម៉ី (LAN HSIN MEI) ភេទស្រី អាយុ ២៣ឆ្នាំ និង៤.ឈ្មោះ ជ័ង អ៊ុំស៊ិន (ZHUNAG YI XUAN) ភេទស្រី អាយុ ១៨ឆ្នាំ៕
ដោយ៖ តារា
