សារព័ត៌មាន នគរវត្ត តែងតែនាំមុខគេជានិច្ច
ទីភ្នាក់ងារសារព័ត៌មានរដ្ឋ KCNA បានរាយការណ៍នៅថ្ងៃទី 29 ខែធ្នូថា មេដឹកនាំកូរ៉េខាងជើងលោក Kim Jong Un ទើបតែធ្វើជាប្រធានកិច្ចប្រជុំការសម្រេចចិត្តគោលនយោបាយដ៏សំខាន់មួយរបស់គណបក្សកាន់អំណាចមុនឆ្នាំថ្មី។
អត្ថបទបាននិយាយថា កិច្ចប្រជុំនៃមន្ត្រីបក្ស និងរដ្ឋាភិបាលបានសម្រេចចិត្តថា កូរ៉េខាងជើងនឹងអនុវត្តយុទ្ធសាស្ត្រ “តឹងតែងបំផុត” ប្រឆាំងនឹងសហរដ្ឋអាមេរិក ដើម្បីធានាសន្តិសុខ និងផលប្រយោជន៍ជាតិរបស់ខ្លួន អត្ថបទនេះ មិនបានបញ្ជាក់លម្អិត នោះឡើយ។
អត្ថបទនេះបានអះអាងថា សម្ព័ន្ធភាពរវាងកូរ៉េខាងត្បូង អាមេរិក និងជប៉ុនបានពង្រីកទៅជា “ប្លុកយោធានុយក្លេអ៊ែរ” ហើយថាកូរ៉េបានក្លាយជា “ច្រកចេញ” របស់អាមេរិក។
KNCA បានសរសេរថា “ការពិតនេះបង្ហាញពីទិសដៅដែលយើងគួរផ្លាស់ទីទៅ អ្វីដែលត្រូវធ្វើ និងរបៀបដែលយើងគួរធ្វើវា” ។
កិច្ចប្រជុំដែលបានធ្វើឡើងពីថ្ងៃទី 23 ដល់ថ្ងៃទី 27 ខែធ្នូក៏បានពិនិត្យឡើងវិញពីរបៀបឆ្លើយតបទៅនឹងទឹកជំនន់ធ្ងន់ធ្ងរនៅដើមឆ្នាំនេះ រួមទាំងផែនការនាំយកប្រជាជនដែលរងផលប៉ះពាល់ទៅកាន់រដ្ឋធានីព្យុងយ៉ាង។
ក្នុងអំឡុងពេលនៃជំនួបនោះ មន្ត្រីកូរ៉េខាងជើងបាននិយាយថា ពួកគេនឹងលើកកម្ពស់ទំនាក់ទំនងជាមួយ “ប្រទេសជាមិត្ត”។
លោកប្រធានាធិបតី គីម បានដឹកនាំជំរុញការអភិវឌ្ឍន៍វិទ្យាសាស្ត្រ និងបច្ចេកវិទ្យាការពារជាតិ ដើម្បីពង្រឹងសមត្ថភាពទប់ស្កាត់របស់ប្រទេស។
ក្នុងរយៈពេលប៉ុន្មានឆ្នាំចុងក្រោយនេះ កិច្ចប្រជុំរបស់កូរ៉េខាងជើងបែបនេះច្រើនតែមានរយៈពេលជាច្រើនថ្ងៃ ហើយបានប្រកាសអំពីគោលនយោបាយសំខាន់ៗ។
ក្នុងឱកាសនេះ ទីក្រុងព្យុងយ៉ាងបានតែងតាំងលោក Pak Thae Song ជានាយករដ្ឋមន្ត្រីថ្មីជំនួសលោក Kim Tok Hun។
រដ្ឋមន្ត្រីការបរទេស Choe Son Hui បានក្លាយជាសមាជិកការិយាល័យនយោបាយនៃគណៈកម្មាធិការមជ្ឈិមបក្ស៕ ដោយ៖ ធីរីណា
រូបថត៖ KCNA
