សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជន២នាក់បានជិះម៉ូតូវ៉ាជែងបញ្ច្រាសទិសដៅចរាចរណ៍ទៅផ្លូវម្ខាងទៀតជ្រុលទៅបុកម៉ូតូមួយគ្រឿងទៀតជិះដោយយុវជន២នាក់ពេញទំហឹងបណ្ដាលឲ្យស្លាប់ម្នាក់និងរបួសធ្ងន់ស្រាល៣នាក់ ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីម៉ោង១០យប់ ថ្ងៃទី១២ ខែមករា ឆ្នាំ២០២៥ នៅជិតរង្វង់មូលព្រះនរាយ៍ ផ្លូវជាតិលេខ២ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
សមត្ថកិច្ចបានឲ្យដឹងថាសពជនរងគ្រោះ មានឈ្មោះ នុន ម៉េងហៀង ភេទប្រុស អាយុ ១៨ឆ្នាំ មុខរបរ ដឹកជញ្ជូនតាមអនឡាញ ស្នាក់នៅ ភូមិលេខ៤ សង្កាត់ស្វាយរលំ ក្រុងតាខ្មៅ ។
ប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកេីតហេតុគេបានឃើញយុវជន២នាក់បានជិះម៉ូតូម៉ាកហុងដាឌ្រីមស៊េរីឆ្នាំ២០១៧ពណ៌ខ្មៅ ពាក់ស្លាកលេខ ភ្នំពេញ 1GL 1337 បានធ្វើដំណើរតាមបណ្ដោយផ្លូវជាតិលេខ២ ក្នុងទិសដៅពីត្បូងទៅជើង ខណៈមកដល់ចំណុចកេីតហេតុ ស្រាប់តែមានយុវជន២នាក់ទៀត បានជិះម៉ូតូម៉ាកហុងដាឌ្រីមស៊េរីឆ្នាំ២០២៥ពណ៌ខ្មៅ ពាក់ស្លាកលេខ ភ្នំពេញ1LB 8896 បានជិះតាមបណ្ដោយផ្លូវជាតិលេខ២ ក្នុងទិសដៅ ពីជើងទៅត្បូងយ៉ាងលឿនបានវ៉ាជែងចូលទៅគន្លងផ្លូវម្ខាងទៀត ជ្រុលទៅបុកម៉ូតូហុងដាឌ្រីមស៊េរីឆ្នាំ២០១៧ពេញទំហឹងបណ្ដាលឲ្យភាគីខាងម៉ូតូហុងដាឌ្រីមស៊េរីឆ្នាំ២០២៥ដែលជិះបញ្ច្រាសស្លាប់ម្នាក់ជាអ្នកបេីក ចំណែកបុរសអង្គុយខាងក្រោយរងរបួសបាក់ជើងម្ខាងត្រូវបានដឹកតាមរថយន្តសាមុយយកទៅសង្គ្រោះនៅមន្ទីរពេទ្យកាល់ម៉ែត្រ ។
រីឯភាគីម្ខាងទៀតម៉ូតូហុងដាឌ្រីមស៊េរីឆ្នាំ២០១៧ដែលជិះផ្លូវត្រង់ រងរបួសធ្ងន់ស្រាលបានដឹកយកទៅសង្គ្រោះនៅមន្ទីរពេទ្យដូចគ្នា ។
បន្ទាប់ពីកេីតហេតុ សមត្ថកិច្ចមូលដ្ឋានបានប្រគល់ឲ្យសមត្ថកិច្ចចរាចរណ៍ក្រុងវាស់វែងយកម៉ូតូទាំង២គ្រឿងទៅរក្សាទុកនៅការិយាល័យនគរបាលចរាចរណ៍ផ្លូវគោករង់ចាំដោះស្រាយនៅពេលក្រោយ ចំណែកសពសមត្ថកិច្ចបានធ្វើកំណត់ហេតុប្រគល់ឱ្យសាច់ញាតិយកទៅធ្វើបុណ្យតាមប្រពៃណី ៕
ដោយ៖ ជ្រោយពេជ្រ
