🔥ផ្អើលទាំងយប់ អគ្គិភ័យឆេះអគារC(០៤) ជាន់ទី០៥ ក្នុងបរិវេណក្រុមហ៊ុនកាស៊ីណូ វីននឺស នៅក្រុងបាវិត

ខេត្តស្វាយរៀង៖ មានការភ្ញាក់ផ្អើលទាំងយប់ដល់អ្នកធ្វើដំណើរនិងបុគ្គលិក ប្រញាប់ប្រញាល់រាយការណ៍ទៅសមត្ថកិច្ចមូលដ្ឋានមកអន្តរាគមន៍ជួយបាញ់ទឹកពន្លត់ខណៈមានអគ្គិភ័យឆេះ អគារ C(០៤) ជាន់ទី០៥ ក្នុងបរិវេណក្រុមហ៊ុនកាស៊ីណូវីននឺស ដោយសារឆ្លងចរន្តអគ្គិសនី(ទុសេ្សខ្សែភ្លើង)នៅក្រុងបាវិត តែសំណាងល្អមិនមានអ្នករងរបួស។

យោងតាមសមត្ថកិច្ចកងរាជអាវុធហត្ថក្រុងបាវិតបានអោយដឹងនាព្រឹកថ្ងៃទី១៨ ខែកុម្ភៈ ឆ្នាំ២០២៥នេះថា ហេតុការណ៍នេះបានកើតឡើងនៅវេលាម៉ោង៩និង១៥នាទីយប់ថ្ងៃទី១៧ ខែកុម្ភៈ ឆ្នាំ២០២៥ នៅចំណុចអគារC(០៤) ជាន់ទី០៥ ក្នុងបរិវេណក្រុមហ៊ុនកាស៊ីណូ វីននឺស ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។

សមត្ថកិច្ចកងរាជអាវុធហត្ថក្រុងបន្តទៀតថា បន្ទាប់ពីមានសេចក្តីរាយការណ៍ថាមានអគ្គិភ័យឆេះក្នុងបរិវេណក្រុមហ៊ុនកាស៊ីណូវីននឺសភ្លាម លោកវរសេនីយ៍ត្រី គ្រុយ សុខឡេង មេបញ្ជាការមូលដ្ឋានកងរាជអាវុធហត្ថក្រុងបាវិត បានដឹកនាំមន្ត្រីក្រោមឱវាទចុះជួយពន្លត់អគ្គិភ័យឆេះ នៅចំណុចអគារC(០៤) ជាន់ទី០៥ ក្នុងបរិវេណក្រុមហ៊ុនកាស៊ីណូវីននឺស ដោយបានប្រើប្រាស់ទឹកអស់ចំនួន១រថយន្ត ពន្លត់អគ្គិភ័យរបស់មូលដ្ឋានកងរាជអាវុធហត្ថក្រុងបាវិតចំនួន១គ្រឿងមកបាញ់ទឹកពន្លត់។

ប្រភពបន្តថា ក្នុងហេតុការណ៍អគ្គិភ័យនោះមិនបណ្តាលឱ្យមានមនុស្សរងរបួសនោះទេ ខណៈខូចខាតសម្ភារ:មួយចំនួន ដូចជាកុំព្យូទ័រជាច្រើនគ្រឿង និងសម្ភារ:ប្រើប្រាស់នៅក្នុងបន្ទប់ផងដែរ។

សមត្ថកិច្ចកងរាជអាវុធហត្ថក្រុងបាវិតបានបញ្ជាក់ពីមូលហេតុ គឺបណ្ដាលមកពីឆ្លងចរន្តអគ្គិសនី(ទុសេ្សខ្សែភ្លើង)បែបនេះ៕

ដោយ៖ សុថាន