ឆ្លងចរន្តអគ្គិសនីឆេះកាប៊ីនភ្លេីងយ៉ាងសន្ធោសន្ធៅផ្អើលសមត្ថកិច្ចចេញរថយន្តពន្លត់អគ្គិភ័យអន្តរាគមន៍បាញ់ពន្លត់

ចែករំលែក៖

ភ្នំពេញ៖ អគ្គិភ័យមួយបានឆាបឆេះកាប៊ីនភ្លេីងមួយកន្លែងយ៉ាងសន្ធោសន្ធៅបង្កការភ្ញាក់ផ្អេីលដល់បងប្អូនប្រជាពលរដ្ឋនិងសមត្ថកិច្ចចុះមកអន្តរាគមន៍ភ្លាមៗ ។

ហេតុការណ៍នេះបានកេីតឡេីងនៅវេលាម៉ោង ២និង៣០នាទីយប់ឈានចូលថ្ងៃទី១៨ខែមីនា ឆ្នាំ២០២៥ទល់មុខក្រុមហ៊ុន វីអី(ខេមបូឌា)ដែលស្ថិតនៅតាមបណ្ដោយផ្លូវ៣៦០កែងផ្លូវ៦៣សង្កាត់បឹងកេងកងទី១ ខណ្ឌបឹងកេងកងរាជធានីភ្នំពេញ ។

តាមប្រភពព័ត៌មានពីពលរដ្ឋ បានឲ្យដឹងថា មុនពេលកេីតហេតុ បង្គោលភ្លើងខាងលើ គឺបានឆ្លងចរន្តអគ្គិសនីម្តងហើយតែត្រូវពួកគាត់ជាពលរដ្ឋនិងសន្តិសុខយកបំពង់ពន្លត់អគ្គិភ័យមកបាញ់ឱ្យរលត់ម្តងរួចទៅហើយ ។

ប្រភពដដែលបានបន្តទៀតថា លុះដល់ម៉ោងកេីតហេតុជាលេីកទី២ ពួកគាត់កំពុងតែសម្រាន្តលង់លក់ក្នុងដំណេកដូចធម្មតា ក៏ស្រាប់តែលឺសំឡេងផ្ទុះ ហេីយពួកគាត់ចេញមកមេីល ឃេីញបង្គោលភ្លើងមានប្រអប់ភ្លើងលាយឡំជាមួយនិងខ្សែអុបទិក ឆាបឆេះសន្ធោសន្ធៅ ទេីបពួកគាត់នាំគ្នាយកបំពង់ពន្លត់អគ្គិភ័យមកបាញ់អស់ជាច្រើនបំពង់តែមិនអាចទប់ស្កាត់បានទេីបរាយការណ៍ជូនកម្លាំងសមត្ថកិច្ចមូលដ្ឋានដេីម្បីសុំជំនួយរថយន្ដបង្ការពន្លត់អគ្គិភ័យឱ្យមកជួយអន្តរាគមន៍បាញ់ពន្លត់ផងដែរ ។

ហេតុការណ៍នេះបន្តិចក្រោយមករថយន្តបង្ការនិងពន្លត់អគ្គិភ័យរបស់ការិយាល័យនៃស្នងការដ្ឋានរាជធានីភ្នំពេញ បានចេញអន្តរាគមន៍ចំនួន២គ្រឿង ដោយសហការជាមួយខាងមន្ត្រីអគ្គិសនីកម្ពុជា ធ្វើការផ្តាច់ចរន្តភ្លើងហេីយបានបាញ់ទឹកពន្លត់អស់ទឹក១រថយន្ដទេីបធ្វើឱ្យភ្លើងរលត់ទៅវិញនៅវេលាម៉ោង៣និង៣០នាទីយប់ថ្ងៃដដែលផងដែរ ។

សមត្ថកិច្ចបានឱ្យដឹងថា ហេតុការណ៍នេះមិនបង្កឱ្យគ្រោះថ្នាក់ដល់មនុស្សណាម្នាក់ ហើយមិនរាលដាលដល់ផ្ទះសំបែងរបស់បងប្អូនប្រជាពលរដ្ឋណានោះទេ គឺគ្រាន់តែខូចប្រអប់ភ្លើង ខ្សែភ្លើងក៏ដូចជាខ្សែអុបទិកអស់មួយចំនួនធំតែប៉ុណ្ណោះ ៕