សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ កម្លាំងសមត្ថកិច្ចជំនាញរបស់ការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ នាព្រឹកថ្ងៃទី២១ ខែមីនា ឆ្នាំ២០២៥នេះ បានហ្វឹកហាត់រៀនអំពីវិធីប្រេីប្រាស់រថយន្តប្រភេទជណ្តេីរ និងការប្រេីប្រាស់ទឹកទុយោបាញ់ទឹកផងដែរ។
ក្នុងការហ្វឹកហាត់នេះដែរ មានការអញ្ជេីញចូលរួមពីលោក KATSUAKI GODA ប្រធានក្រុមការងារសមាគមអ្នកពន្លត់អគ្គិភ័យជប៉ុន ព្រមទាំងក្រុមការងារសមាគមអ្នកពន្លត់អគ្គិភ័យជប៉ុន ដែលតែងតែបង្ហាត់បង្រៀនដល់មន្ត្រីជំនាញការិយាល័យនគរបាលបង្ការពន្លត់អគ្គិភ័យ និងសង្គ្រោះ ដេីម្បីធានាបាននូវការជួយសង្គ្រោះប្រជាពលរដ្ឋ និងឆ្លេីយតបតាមតម្រូវការចាំបាច់នៃការងារពន្លត់អគ្គិភ័យផងដែរ។ គេសង្កេតឃេីញថា នៅរាជធានីភ្នំពេញតែងតែមានអគារខ្ពស់ៗ ដែលចាំបាច់ត្រូវធ្វេីការហ្វឹកហាត់ឲ្យបានត្រឹមត្រូវ នៅពេលមានអគ្គិភ័យកេីតឡេីងហេីយត្រូវការអន្តរាគមន៍ភ្លាមៗ។
ដោយនៅក្នុងនោះដែរ លោក KATSUAKI GODA ប្រធានក្រុមការងារសមាគមអ្នកពន្លត់អគ្គិភ័យជប៉ុន ក៏បានណែនាំដល់មន្ត្រីជំនាញការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ត្រូវតែបង្កេីនការយកចិត្តទុកដាក់ខ្ពស់បំផុត ជាពិសេស ត្រូវធ្វេីការស្វែងយល់ និងរៀនសូត្របន្ថែមទៀត ក្នុងការងារជួយសង្គ្រោះប្រជាពលរដ្ឋឲ្យបានទាន់ពេលវេលា។
ជាចុងក្រោយលោក KATSUAKI GODA ប្រធានក្រុមការងារសមាគមអ្នកពន្លត់អគ្គិភ័យជប៉ុន ក៏បានថ្លៃងអំណរគុណដល់មន្ត្រីជំនាញការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ដែលបានយកចិក្តទុកដាក់ខ្ពស់ក្នុងការហ្វឹកហាត់រៀនសូត្រអំពីការប្រេីប្រាស់រថយន្តជណ្តេីរ ក៏ដូចជាវិធីជួយសង្គ្រោះមនុស្សដែលបានជាប់នៅក្នុងអគារ៕
ដោយ ៖ ភារ៉ា ដង្កោ
