សារព័ត៌មាន នគរវត្ត តែងតែនាំមុខគេជានិច្ច
ប្រទេសមីយ៉ាន់ម៉ា ៖ ចំនួនមនុស្សស្លាប់ដោយសារគ្រោះរញ្ជួយដី នៅមីយ៉ាន់ម៉ា កើនឡើងជាង ២៧០០នាក់ និងរបួសជាង ៤៥០០នាក់ខណៈក្រុមអ្នកជួយ សង្គ្រោះរុស្ស៊ី ចិន និងប្រទេសផ្សេងៗទៀតនៅតែបន្ត កិច្ចខិតខំប្រឹងប្រែងរួមគ្នាសង្រ្គោះពួកគេ បើទោះបីជាក្តីសង្ឃឹមសម្រាប់អ្នករស់រានមានជីវិតកាន់តែរសាត់បាត់ទៅៗក្តី ។
ថ្វីត្បិតគ្រោះរញ្ជួយដីកម្រិត ៧,៧ រ៉ិចទ័រ បាន បង្កការបំផ្លិចបំផ្លាញ យ៉ាងខ្លាំងដល់ប្រទេសមីយ៉ាន់ម៉ា កាលពីថ្ងៃទី២៨ ខែមីនា របបសឹក យោធាដែលកំពុងកាន់អំណាចនៅតែ បដិសេធការអំពាវនាវឲ្យ មានបទឈប់បាញ់ ដែលស្នើដោយក្រុមអង្គការប្រដាប់អាវុធជនជាតិភាគតិច។
យោងតាមការចុះផ្សាយរបស់ Myanmar Now នៅថ្ងៃទី២ ខែមេសា ឆ្នាំ២០២៥ របប សឹក មីយ៉ាន់ម៉ា បន្តប្រតិបត្តិការយោធារបស់ខ្លួនប្រឆាំងនឹងក្រុមប្រដាប់អាវុធ ខណៈ ប្រទេសអាស៊ានមួយនេះ រងការវាយ ប្រហារខ្លាំងពីការរញ្ជួយដីដែលបណ្ដាលឲ្យ មានមនុស្សជិត ៣០០០ នាក់ បាត់បង់ជីវិត ហើយតួលេខនេះ ត្រូវបានគេរំពឹងថានឹងកើនឡើងបន្តទៀត។
ដើម្បីឆ្លើយតបទៅនឹងគ្រោះមហន្តរាយ ចលនាតស៊ូដ៏សំខាន់របស់មីយ៉ាន់ម៉ា ដែល ហៅ ថា «រដ្ឋាភិបាលឯកភាពជាតិ (NUG)» បានប្រកាសបទឈប់បាញ់ជាផ្នែកឯកតោភាគី ក្នុងគោលបំណងជួយសម្រួលដល់កិច្ចខិតខំប្រឹងប្រែងជួយសង្គ្រោះ។ NUG បានសម្តែងការប្តេជ្ញាចិត្តរបស់ខ្លួន ក្នុងការសហការជាមួយអង្គការអន្តរជាតិ ដើម្បីធានាការបញ្ជូនជំនួយមនុស្សធម៌ទៅកាន់តំបន់ដែលរងផលប៉ះពាល់៕
ដោយ ៖ សិលា
