ព័ត៌មានទាន់ហេតុការណ៍៖

សង្ស័យស្រវឹងជិះម៉ូតូបុកបារាសរថភ្លេីងបណ្តាលឲ្យរងរបួសធ្ងន់

ចែករំលែក៖

ភ្នំពេញ៖​ បុរសម្នាក់បានរងរបួសធ្ងន់ត្រូវបានរថយន្តកងសង្គ្រោះបន្ទាន់៧១១កងពលតូចលេខ៧០ដឹងបញ្ជូនទៅមន្ទីរពេទ្យភ្លាមៗបន្ទាប់ពីជួបគ្រោះថ្នាក់ចរាចរណ៍សង្ស័យស្រវឹងជិះម៉ូតូលឿនមិនប្រយ័ត្នក៏ជ្រុលបុកបារាសរថភ្លេីងកាលពីវេលាម៉ោង១៩និង២៧នាទី  ថ្ងៃទី១២ ខែមេសា ឆ្នាំ២០២៥ នៅតាមផ្លូវជាតិលេខ៤ ភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ  រាជធានីភ្នំពេញ។ 

ជនរងគ្រោះមានឈ្មោះ វ៉ាត ជុងយៀង ភេទប្រុស អាយុ៣២ឆ្នាំ រងរបួសបែកក្បាលខាងក្រោយ មានទីលំនៅ ភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ 

តាមប្រភពព័ត៌មានបានឲ្យដឹងថា​ មុនពេលកេីតហេតុមានរថភ្លេីងមួយខ្សែបេីកឆ្លងកាត់ពេលនោះសន្តិសុខបានទាញបារាសបិទមិនអនុញ្ញាតឲ្យយានយន្តឆ្លងកាត់ផ្លូវជាតិលេខ៤នោះទេ​ ភ្លាមនោះស្រាប់តែមានបុរសម្នាក់បេីកម៉ូតូម៉ាកMSX ពណ៌សលាយ​ខ្មៅ​ ពាក់ស្លាកលេខភ្នំពេញ1DH 6900​ ធ្វេីដំណេីរតាមបណ្តោយផ្លូវជាតិលេខ៤​ ក្នុងទិសដៅពីលិចទៅកេីតលឿនដោយសង្ស័យស្រវឹងទៀតផងក៏ជ្រុលបុកបារាសរថភ្លេីងពេញទំហឹងបណ្តាលឲ្យដួលបោកក្បាលទៅនឹងផ្លូវរងរបួសធ្ងន់។ 

ក្រោយកេីតហេតុជនរងគ្រោះត្រូវបានរថយន្តសង្គ្រោះរបស់អង្គភាព៧១១ កងពលតូចលេខ៧០ ដឹកបញ្ជូនទៅមន្ទីរពេទ្យព្រះកុសុមៈ​ ចំណែកម៉ូតូត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលរដ្ឋបាលត្រពាំងក្រសាំងដេីម្បីដោះស្រាយពេលក្រោយ៕

ដោយ៖សុខាសែនជ័យ


ចែករំលែក៖