សារព័ត៌មាន នគរវត្ត តែងតែនាំមុខគេជានិច្ច
មនុស្សរាប់ពាន់នាក់បានធ្វើការតវ៉ាក្នុងប្រទេសអុីរ៉ង់ និងអុីរ៉ាក់ប្រឆាំងនឹងសង្រ្គាមរបស់អុីស្រាអែលប្រឆាំងនឹងអុីរ៉ង់។
ប្រជាជននៅក្នុងរដ្ឋធានី Tehran បានដើរដង្ហែបន្ទាប់ពីការអធិស្ឋានប្រចាំសប្តាហ៍កាលពីថ្ងៃទី 20 ខែមិថុនា ដោយស្រែកពាក្យស្លោកគាំទ្រមេដឹកនាំប្រទេស និងកាន់រូបភាពមេបញ្ជាការដែលបានស្លាប់ចាប់តាំងពីការចាប់ផ្តើមនៃសង្រ្គាមរវាងអុីរ៉ង់ នឹងអុីស្រាអែល។ ពួកគេក៏បានគ្រវីទង់ជាតិអុីរ៉ង់ និងទង់ជាតិរបស់ក្រុមហេសបូ៊ឡា របស់ប្រទេសលីបង់ផងដែរ។
បដាមួយក្នុងចំណោមបដាជាច្រើនសរសេរថា “ខ្ញុំនឹងលះបង់ជីវិតរបស់ខ្ញុំដើម្បីមេដឹកនាំរបស់ខ្ញុំ” ដែលសំដៅទៅលើមេដឹកនាំកំពូល Ali Khamenei ។
ការតវ៉ាក៏បានកើតឡើងក្នុងទីក្រុងផ្សេងទៀតនៅទូទាំងប្រទេសរួមទាំងក្រុង Tabriz នៅភាគពាយ័ព្យ និង Shiraz នៅភាគខាងត្បូង។ ទូរទស្សន៍អុីរ៉ង់បានរាយការណ៍ថា “ថ្ងៃនៃសាមគ្គីភាព និងការតស៊ូរបស់ប្រជាជនអុីរ៉ង់កំពុងត្រូវបានបង្ហាញនៅទូទាំងប្រទេស” ។
នៅក្នុងប្រទេសអុីរ៉ាក់ អ្នកគាំទ្ររាប់ពាន់នាក់នៃបព្វជិតដ៏មានឥទ្ធិពល Moqtada Sadr បានតវ៉ានៅទីក្រុងបាកដាដ និងទីក្រុងផ្សេងទៀតប្រឆាំងនឹងសង្រ្គាមរបស់អុីស្រាអែលជាមួយអុីរ៉ង់។ក្រុមអ្នកតវ៉ាបានស្រែកបន្ទរបន្ទាប់ពីការបន់ស្រន់នៅក្នុងសង្កាត់ Sadr នៃក្រុងបាកដាដ ថា “ទេចំពោះអុីស្រាអែល! ទេចំពោះអាមេរិក!” ។
អ្នកតវ៉ា Abu Hussein អាយុ 54 ឆ្នាំបាននិយាយថា “នេះគឺជាសង្រ្គាមអយុត្តិធម៌។ អុីស្រាអែលគ្មានសិទ្ធិ” វាយប្រហារអុីរ៉ង់ទេ។ “អុីស្រាអែលមិនខ្វល់អំពីកម្មវិធីនុយក្លេអ៊ែររបស់អុីរ៉ង់ទេ។ អ្វីដែលអុីស្រាអែល និងអាមេរិកចង់បានគឺគ្រប់គ្រងតំបន់មជ្ឈិមបូព៌ា”។
លោក Hussein បាននិយាយថា លោកសង្ឃឹមថា អ៊ីរ៉ង់នឹងឈ្នះសង្រ្គាម ហើយថាអ៊ីរ៉ាក់គួរតែគាំទ្រប្រទេសជិតខាងរបស់ខ្លួន “ដោយលុយ អាវុធ និងការតវ៉ា”។
នៅទីក្រុង Basra ភាគខាងត្បូងប្រទេសអ៊ីរ៉ាក់ មនុស្សប្រហែល ២០០០ នាក់បានតវ៉ាបន្ទាប់ពីការបន់ស្រន់។ បព្វជិត Shia Qusai al-Assadi អាយុ 43 ឆ្នាំបានថ្កោលទោសការប្រើប្រាស់ដែនអាកាសរបស់អ៊ីរ៉ាក់ដើម្បីវាយប្រហារអ៊ីរ៉ង់។ លោកបាននិយាយថា “នេះគឺជាការរំលោភលើអធិបតេយ្យភាពរបស់អ៊ីរ៉ាក់” ដោយព្រមានអំពី “សង្គ្រាមលោកលើកទី 3 ប្រឆាំងនឹងសាសនាអ៊ីស្លាម” ៕
ដោយ៖ ធីរីណា(រូបថត៖ AFP)
