សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ការឯកភាពលើ បទឈប់បាញ់ រវាងកម្ពុជា និងថៃ ដែលចូលជាធរមានចាប់ពីម៉ោង ១២ ថ្ងៃត្រង់ នាថ្ងៃទី ២៧ ខែធ្នូ ឆ្នាំ ២០២៥ ត្រូវបានគេរំពឹងថា នឹងនាំមកនូវសន្តិភាព និងការបន្ថយភាពតានតឹងតាមបន្ទាត់ព្រំដែន។ ប៉ុន្តែជាក់ស្តែង វាបានក្លាយជាការបង្ហាញច្បាស់ថា ការឯកភាពនោះ ត្រូវបានរំលោភយ៉ាងគ្មានការខ្មាសអៀនពីថៃ។
បន្ទាប់ពីបទឈប់បាញ់ចូលជាធរមាន មិនយូរប៉ុន្មាន យោធាថៃបានរំកិលកម្លាំងចូលក្នុងទឹកដីកម្ពុជា នៅតំបន់ជាច្រើនកន្លែង ប្បំផ្លាញផ្ទះសម្បែងរបស់ប្រជាពលរដ្ឋស៊ីវិល។ ទង្វើទាំងនេះ មិនត្រឹមតែជាការរំលោភលើអធិបតេយ្យភាពរបស់កម្ពុជា ប៉ុណ្ណោះទេ ប៉ុន្តែថែមទាំងជាការបំពានយ៉ាងធ្ងន់ធ្ងរលើច្បាប់អន្តរជាតិ និងគោលការណ៍មនុស្សធម៌ផងដែរ។
អ្វីដែលគួរឲ្យកត់សម្គាល់ជាងនេះទៅទៀត គឺចាប់តាំងពីពេលនោះមក សកម្មភាពបែប «ល្ខោនជាន់មីន» ដែលធ្លាប់តែបង្ហាញមុខបោកបញ្ឆោត AOT និងសហគមន៍អន្តរជាតិ របស់ភាគីថៃ មិនបានឃើញសំដែងដូចមុនទៀតឡើយ។ នេះបង្ហាញយ៉ាងច្បាស់ថា សហគមន៍អន្តរជាតិ កំពុង “ភ្ញាក់ខ្លួន” និងលែងជឿលើការបកស្រាយ ឬការបង្ហាញមុខបែបសម្តែង ដើម្បីលាក់បាំងការពិតរបស់ថៃ Don’t thai to ME ។
ការប្រើបទឈប់បាញ់ជាឧបករណ៍ ដើម្បីកេងពេលវេលា បង្កើនកម្លាំង ជិកលេនដ្ឋាន និងបន្តសកម្មភាពយោធា គឺជាយុទ្ធសាស្ត្រដែលពិភពលោកមិនអាចទទួលយកបានទៀតឡើយ។ ទង្វើបែបនេះ បានបង្ហាញការមិនស្មោះត្រង់ និងការមិនគោរពកិច្ចព្រព្រៀង ដែលសហគមន៍អន្តរជាតិ កំពុងខិតខំរក្សា។
នៅចំពោះមុខភាពពិតដ៏ឃោរឃៅនេះ ប្រជាពលរដ្ឋកម្ពុជា នៅតំបន់ព្រំដែន នៅតែជាអ្នករងគ្រោះដោយផ្ទាល់ ខណៈដែលពិភពលោក កំពុងតាមដានយ៉ាងយកចិត្តទុកដាក់។
«ល្ខោនជាន់មីន» អាចបោកមនុស្សបានម្តង ឬពីរដង ប៉ុន្តែមិនអាចបោកការពិត និងមតិអន្តរជាតិបានជានិច្ចនោះទេ៕
ដោយ៖តាបូរណ៍
