អាល្លឺម៉ង់គាំទ្រទំនើបកម្មគយ និងបង្កើនប្រសិទ្ធភាពពាណិជ្ជកម្មនៅកម្ពុជា

ភ្នំពេញ ៖ យោងតាមការបង្ហោះផ្សាយរបស់ស្ថានទូតនៃសាធារណរដ្ឋសហព័ន្ធអាល្លឺម៉ង់ នៅថ្ងៃទី២៨ ខែមេសា ឆ្នាំ២០២៦ បានឱ្យដឹងថា ឯកអគ្គរដ្ឋទូតអាល្លឺម៉ង់ លោក Stefan Messerer រួមជាមួយឯកអគ្គរដ្ឋទូតសហភាពអឺរ៉ុប លោក Igor Driesmans និងតំណាងមកពីក្រសួង និងដៃគូសំខាន់ៗ បានអញ្ជើញទៅទស្សនកិច្ចនៅអាកាសយានដ្ឋានអន្តរជាតិតេជោថ្មី ដើម្បីឃើញដោយផ្ទាល់នូវរបៀបដែលកិច្ចគាំទ្ររួមគ្នារបស់យើងកំពុងជួយដល់ការធ្វើទំនើបកម្មគយ និងបង្កើនប្រសិទ្ធភាពពាណិជ្ជកម្ម។

តាមរយៈកម្មវិធី EU-German GATE ប្រទេសអាល្លឺម៉ង់ និងសហភាពអឺរ៉ុបមានមោទនភាពក្នុងការគាំទ្រការដាក់ឱ្យដំណើរការ ការបំពេញបែបបទគយមុនពេលទំនិញមកដល់ (PAP) តាមប្រព័ន្ធអេឡិចត្រូនិក ដែលជួយឱ្យទំនិញដឹកជញ្ជូនបានលឿន និងរលូនជាងមុន។ នៅក្នុងដំណើរទស្សនកិច្ចនេះផងដែរ ក៏បានបង្ហាញពីតួនាទីដ៏សំខាន់របស់ដៃគូវិស័យឯកជន រួមទាំង DHL ក្នុងការធ្វើឱ្យភស្តុភារកម្មកាន់តែមានប្រសិទ្ធភាព និងអាចទុកចិត្តបាន។

លោកឯកអគ្គរដ្ឋទូត Messerer បានមានប្រសាសន៍ថា “ប្រទេសអាល្លឺម៉ង់មានមោទនភាពក្នុងការគាំទ្រប្រទេសកម្ពុជាក្នុងការជំរុញការផ្លាស់ប្តូរឌីជីថលគយរបស់ខ្លួន។ ការធ្វើទំនើបកម្មច្រកទ្វារទាំងនេះនឹងពន្លឿនពាណិជ្ជកម្ម ជំរុញកំណើនអាជីវកម្ម និងពង្រឹងស្តង់ដារភាពជឿជាក់សម្រាប់ទីផ្សារសកល” ៕

ដោយ ៖ សិលា