សារព័ត៌មាន នគរវត្ត តែងតែនាំមុខគេជានិច្ច
ក្រុងប៉ោយប៉ែត៖ កម្លាំងជំនាញរបស់អគ្គស្នងការដ្ឋាននគរបាលជាតិ ក្រោមការដឹកនាំប្រតិបត្តិការដោយ លោកឧត្តមសេនីយ៍ឯក មួង សុធា , លោកឧត្តមសេនីយ៍ឯក សម វណ្ណវីរៈ , លោកឧត្តមសេនីយ៍ឯក អុី សុខឃី ឣគ្គស្នងការរងនគរបាលជាតិ តំណាងលោកនាយឧត្តមសេនីយ៍ ស ថេត អគ្គស្នងការនគរបាលជាតិ និងមានការចូលរួមពីកម្លាំងគណៈបញ្ជាការឯកភាពខេត្ត ដឹកនាំដោយ លោក ប្រាក់ ប៉ូលី អភិបាលរងខេត្តបន្ទាយមានជ័យ ដឹកនាំសម្របសម្រួលនីតិវិធីដោយ លោក សំរិទ្ធ សុខុន ព្រះរាជអាជ្ញារង អមសាលាដំបូងខេត្ត មានចូលរួមដោយកម្លាំងនៃស្នងការដ្ឋាននគរបាលខេត្តបន្ទាយមានជ័យ កងរាជអាវុធហត្ថខេត្ត និងរដ្ឋបាលក្រុងប៉ោយប៉ែត នៅថ្ងៃទី១៩ ខែមិថុនា ឆ្នាំ២០២៦ បានចុះត្រួតពិនិត្យអាគារស្នាក់នៅចំនួន៤ទីតាំង ក្នុងក្រុងប៉ោយប៉ែត ខេត្តបន្ទាយមានជ័យ បានរកឃើញជនបរទេសស្នាក់នៅប្រមូលផ្តុំចំនួន ១១៧នាក់ (ស្រី២០នាក់) និងបិទសៀលបណ្តោះអាសន្នមួយទីតាំងដែលកំពុងប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា។
សូមជម្រាបថា ចំពោះទីតាំងទី១,៣,៤ មានជនបរទេសស្នាក់នៅប្រមូលផ្តុំ និងរកពុំឃើញមានសម្ភារៈសម្រាប់ព្រឹត្តប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Scam online)នោះទេ ហើយបានប្រគល់ជូនជំនាញអន្តោប្រវេសន៍ជាអ្នកគ្រប់គ្រងនិងបន្តនីតិវិធី។
ដោយឡែកទីតាំងទី២ដែលរកឃើញមានជនបរទេស និងជនជាតិខ្មែរស្នាក់នៅចំនួន ២៧នាក់ (ស្រី១៨នាក់) កំពុងប្រព្រឹត្តបទល្មើសតាមប្រព័ន្ធបច្ចេកវិទ្យា(Online Scams) ត្រូវបានបិទសៀលទីតាំងជាបណ្តោះអាសន្ន។
ក្នុងប្រតិបត្តិការចុះបង្ក្រាបខាងលេីនេះ ជនសង្ស័យទាំងនេះត្រូវបានកម្លាំងអធិការដ្ឋាននគរបាលក្រុងប៉ោយប៉ែតយកទៅសាកសួរនិងស្រាវជ្រាវបន្តតាមនីតិវិធី៕ដោយ៖តារា
