សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ នាវាទេសចរណ៍អន្តរជាតិដ៏ប្រណីត ១គ្រឿង មានឈ្មោះថា ODYSSEY ពាក់សញ្ជាតិ BAHAMAS នៅព្រឹកថ្ងៃទី២៥ ខែកញ្ញា ឆ្នាំ២០២៦ បានចូលចតយ៉ាងសុវត្ថិភាពនៅឯកំពង់ផែស្វយ័តក្រុងព្រះសីហនុ ដើម្បីនាំយកភ្ញៀវទេសចរមកទស្សនាកម្សាន្តក្នុងព្រះរាជាណាចក្រកម្ពុជា។
យោងតាមរបាយការណ៍បានឱ្យដឹងថា នាវាទេសចរណ៍នេះមានផ្ទុក ភ្ញៀវទេសចរអន្តរជាតិសរុប ២៣៦ នាក់ (ស្រី ១៣៥នាក់) មកពី ១៧សញ្ជាតិ បុគ្គលិកនាវិកសរុប ១៦៦នាក់ (ស្រី ១៧នាក់) មកពី ២០សញ្ជាតិ។
វត្តមាននៃការចូលចតរបស់នាវាទេសចរណ៍ ODYSSEY នាពេលនេះ គឺជាសញ្ញាណដ៏ល្អប្រសើរមួយបង្ហាញពីការងើបឡើងវិញ និងភាពទាក់ទាញនៃវិស័យទេសចរណ៍សមុទ្ររបស់កម្ពុជា ដែលតែងតែស្វាគមន៍យ៉ាងកក់ក្តៅចំពោះភ្ញៀវទេសចរគ្រប់ជាតិសាសន៍។
ក្នុងអំឡុងពេលឈប់សម្រាកនៅខេត្តព្រះសីហនុ ភ្ញៀវទេសចរអន្តរជាតិទាំងអស់គ្រោងនឹងចុះទស្សនាកម្សាន្តតាមតំបន់រមណីយដ្ឋាន និងឆ្នេរសមុទ្រដ៏ស្រស់ស្អាតនានា ព្រមទាំងស្វែងយល់ពីវប្បធម៌ និងប្រពៃណីដ៏សម្បូរបែបរបស់កម្ពុជាផងដែរ៕ដោយ៖តារា
