ព័ត៌មានទាន់ហេតុការណ៍៖

Update៖ ករណីស្នេហាត្រីកោណ ជនដៃដល់ត្រូវបានឃាត់ខ្លួនក្រោយកាប់សម្លាប់គូទំនាស់រឿងលួចទាក់ទងប្រពន្ធ

ចែករំលែក៖

ខេត្តបន្ទាយមានជ័យ៖ កម្លាំងសមត្ថកិច្ចនគរបាលក្រុងសិរីសោភ័ណ បានឃាត់ខ្លួនជនសង្ស័យម្នាក់ក្នុងករណីឃាតកម្មកាប់សម្លាប់គូទំនាស់ ព្រោះរឿងលួចទំនាក់ ទំនងស្នេហាជាមួយប្រពន្ធខ្លួន។

ករណីឃាតកម្មនេះ បានកើតឡើងកាលពីម៉ោង១២យប់រំលងអធ្រាត្រ ឈានចូលថ្ងៃទី២០ ខែវិច្ឆិកា ឆ្នាំ២០២៦ នៅភូមិរោងម៉ាស៊ីន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។ ជនរងគ្រោះក្នុងហេតុការណ៍នេះឈ្មោះ អ៊ុក ហាក់ ភេទប្រុស អាយុ៣៧ឆ្នាំ មុខរបរកម្មករទឹកស្អាត មានស្រុកកំណើតស្រុកសូនិគមខេត្តសៀមរាប ស្នាក់នៅភូមិរោងម៉ាស៊ីន សង្កាត់អូរអំបិល ក្រុងសិរីសោភ័ណ។

តាមការបញ្ជាក់ពីសាច់ញាតិជនរងគ្រោះបានប្រាប់ថា មុនកើតហេតុជនរងគ្រោះកំពុងដើរតាមផ្លូវពេលយប់ ហើយក៏ត្រូវបានជនដៃដល់យកកាំបិតកាប់ចំ ៣កន្លែង រួចរត់ពីកន្លែងកើតហេតុបានប្រមាណជិត១០០ម៉ែត្រ ដល់មុខផ្ទះស្រែអោយគេជួយ ពេលសាច់ញាតិចេញមកជួយ ឃើញជនដៃដល់ជិះម៉ូតូគេចខ្លួនទៅបាត់។

ចំណែកជនរងគ្រោះត្រូវបាននាំយកទៅសង្រ្គោះនៅមន្ទីពេទ្យតែជាអកុសលបានស្លាប់បាត់ទៅហើយ។

តាមប្រភពនានាពីអ្នកធ្វើការជាមួយជនរងគ្រោះបញ្ជាក់ថា ករណីឃាត់កម្មកាប់សម្លាប់លើជនរងគ្រោះនេះ ជាករណីស្នេហាត្រីកោណ ដោយជនរងគ្រោះបានលួចទំនាក់ទំនងស្នេហាជាមួយប្រពន្ធជនសង្ស័យរយៈពេលច្រើនខែមកហើយ ទើបប្តីគេមកកាប់បណ្តាលជនរងគ្រោះរបួសធ្ងន់រហូតដល់ស្លាប់។

ជនសង្ស័យមានឈ្មោះ វីត អ្នករស់នៅភូមិរោងម៉ាស៊ីន ជាមួយគ្នា ហើយជនដៃដល់ក៏ធ្លាប់ព្រមានជនរងគ្រោះឱ្យឈប់ទាក់ទងប្រពន្ធរបស់ខ្លួន រហូតជនដៃដល់ឱ្យប្រពន្ធទៅធ្វើការនៅភ្នំពេញរយៈពេលជិត១ខែមកហើយ។

ក្រោយកើតហេតុ សមត្ថកិច្ចនគរបាលបានបញ្ជាក់ថា ករណីឃាតកម្មកាប់ទៅលើជនរងគ្រោះត្រូវចំនួន៣ កន្លែង រងរបួសធ្ងន់ក្រោយបញ្ជូនដល់មន្ទីពេទ្យបានស្លាប់ ហើយជនដៃដល់បានរត់គេចខ្លួនតែត្រូវបានសមត្ថកិច្ចតាមចាប់បានភ្លាមៗ កាលពីព្រឹកថ្ងៃទី២០ វិច្ឆិកានេះ។ សពជនរងគ្រោះត្រូវបានយកទៅតម្កល់ទុកធ្វើបុណ្យវត្តសុភមង្គល។

ជនសង្ស័យត្រូវបានសមត្ថកិច្ចកសាងសំណុំរឿងចាត់ការតាមនីតិវិធី៕


ចែករំលែក៖