សារព័ត៌មាន នគរវត្ត តែងតែនាំមុខគេជានិច្ច
លោកDanny Blind ត្រូវបណ្តេញចេញពីតំណែងគ្រូបង្វឹកជម្រើសជាតិហុល្លង់ក្រោយដឹកនាំបានរយៈពេល២ឆ្នាំ។
ក្រោយប្រកួតចាញ់ក្រុមជម្រើជាតិប៊ុលហ្គារី ក្រុមមច្ចុរាជ ពណ៌ទឹកក្រូចហុល្លង់ដែលធ្លាប់ជាក្រុមខ្លាំងកាលពីអតីតកាល បានធ្លាក់មកឈរលេខរៀងទី៤ក្នុងពូលA មាន៧ពិន្ទុក្នុងចំណោម៥ប្រកួត។
គ្រូបង្វឹកវ័យ៥៥ឆ្នាំ Danny Blind បានមកដឹកនាំក្រុមជម្រើសជាតិ ហុល្លង់ជំនួសតំណែងលោក Guus Hiddink ក្នុងឆ្នាំ២០១៥ ដោយក្រុម របស់គាត់មិនបានទទួលកៅអីទៅលេងយូរ៉ូឆ្នាំ២០១៦នៅប្រទេសបារាំងនោះឡើយ។ ហើយបច្ចុប្បន្នក្រុមហុល្លង់អាចនឹង អត់មានកៅអីទៅលេង World Cup ឆ្នាំ២០១៨នៅប្រទេសរុស្ស៊ី ប្រសិនបើពួកគេនៅតែបន្តទំរង់អន់ដដែលនោះ។
លោក Fred Grim ដែលដឹកនាំក្រុមជម្រើសជាតិហុល្លង់ អាយុក្រោម២១ឆ្នាំនឹងឡើងដឹកនាំក្រុមឈុតធំនេះបណ្តោះអាសន្ន។ រីឯគ្រូបង្វឹកថ្មី សហព័ន្ធបាល់ទាត់ហុល្លង់ នឹងស្វែងរក ប្រកាសតែងតាំង នាពេលអនាគតឆាប់ៗ។
ចំណែកលោក Louis van Gaal អតីតគ្រូបង្វឹកក្រុមជម្រើសជាតិ ហុល្លង់ និងក្រុមបិសាចក្រហម ថាគាត់កំពុងតែជួយស្វែងរក គ្រូបង្វឹកថ្មីមកជំនួសលោក Danny Blind ឲ្យកាន់តែឆាប់តាមដែលអាច ធ្វើទៅបាន។ តែគាត់បានបញ្ជាក់ថា វាមិនអាចជ្រើសរើសគ្រូបង្វឹកបានត្រឹមតែរយៈពេល១សប្តាហ៍នោះទេ ៕ ដេវីត
